[A:472] mi yi lus ni tshogs kyis rnyed par dka'/ /kye ma dad pa dang ni chos nyan pa/ /'di 'dra bskal pa brgyar yang rnyed par dka'/ /zhes dang / rgya rol las/ mi dang sangs rgyas 'byung rnyed dka'/ /dad pa'ang shin tu rnyed par dka'/ /mi khom brgyad spangs rnyed par dka'/ /chos nyan pa ni gtso bo yin/ /zhes dang / dkon brtsegs las/ thos par 'dod pas thos pa 'phel/ /thos pas shes rab 'phel bar 'gyur/ /shes rab kyis ni don rnams sbyong / /don thob nas ni de thob 'gyur/ /zhes so/ /dam pa'i chos kyi don phun sum tshogs pa ma go yang dam pa'i chos thos pa la phan yon tshad med de/ dge slong chos sred chu srin du gyur pa'i tshe sangs rgyas kyi sgra tsam thos pas mir skyes pa dang / khye'u chu 'bebs kyis sangs rgyas kyi mtshan bsgrags chos bshad pas nya khri tham pa lhar skyes/ dge 'dun srung gis mdo bton pa/ drang srong lnga brgyas phag nyan byas pas phyir mi 'ong ba'i 'bras bu thob/ gzungs rnams nas gzungs gang dag dud 'gro'i skye gnas pa rnams kyi rna lam du bsgrags pas ngan 'gro las thar ba sogs gsungs so/ / rnam pa thams cad mkhyen pa rgyal ba nyid kyis kyang / kun dga' bo dang / 'od srung chen po la byang chub kyi yan lag bdun nas brtsams te chos gsan gsungs so/ /des na bdag ni/ gsang sngags rgyud sde dang mthun/ spyod pa 'dul ba dang mthun/ bshad pa mngon pa dang mthun/ sgom pa mdo sde dang mthun pa/ paN grub rnams kyis bshad/ lo tsA bas bsgyur/ mkhas pa rnams la yongs su grags pa'i chos rnams/ dper na/ shi bi'i rgyal pos rang gi sha khrag gis mchod nas srin po la chos nyan pa dang / rgyal po legs bshad tshol gyis chos kyi yon du rang lus ri bo'i rtse nas 'phangs pa dang / shi bi'i rgyal pos lus la mar me stong spar ba dang / rje btsun 'jam dbyangs da dung 'dren