[A:459]pa thug rje chen po dang ldan pa des dang por gdul bya lam la 'jug pa dang/ bar du smin pa dang/ mthar grol par mdzad pa'i gsung gi sgo de dag la ni chos kyi 'khor lo rim pa gsum du bskor ba zhes bya la/ de'i 'og tu dgra bcom pa chos kyi spyan ldan mi brjed pa'i gzungs thob pa rnams kyis sde snod gsum gyi tshig blo la 'don pas bton pa dang/ de'i 'og tu legs par gsungs pa'i chos 'dul ba la dri mar gyur pa sun phyung ba dang/ de'i 'og tu sde snod gsum glegs bam du bris te bzhugs su gsol ba la ni bka' bsdu ba rim pa gsum/ zhes bya ba'i tha snyad do//
de'i 'og tu bstan pa'i 'dzin pa dang drang nges 'byed par lung bstan pa'i slob dpon dag dang/ de'i slob ma dang nying slob tu gyur pa rnams kyis bka' dang yid ches kyi gnas su khyad par med pa'i bstan bcos kyi tshogs gsar du mdzad pa dang/ rgyal ba'i bka' nyid kyi chad pa gso ba dang/ ma dag pa sun phyung ba'i sgo nas bstan pa rin po che dar zhing yun ring du gnas par mdzad pa yin te/ dper na mgon po klu sgrub zhabs kyiskyi klu'i yul nas yum spyan drangs te/ sa'i steng du seng ge'i sgra lan gsum du bsgrags pa dang/ thogs med zhabs kyis dga' ldan nas byams pa'i chos lnga spyan drangs/ sa sde lnga la sogs pa'i bstan bcos kyis shing rta'i srol phye ba lta bu'o//