[A:22]tha snyad 'chad la dga' dang bcas//
zab lam re re yis kyang grol ba ster//
gsal ba'i spobs pa mchog kyang rnyed pa lags//
dam pa kun gyi gsung gi rnga bo che//
skal bzang rab dga'i dbyug gus bskul ba las//
zhen pa rang grol mchog gis brjod pa'i gtam//
gang gis thos pa don dang bcas par 'gyur//
'dir 'khor ba'i byings las yongs su ma brgal ba'i bdag cag so so skye bo'i rang 'tshang gi cha/ brdzun sgrib dang bral ba'i brjod pa'i sgo cung zad gleng ba ni/ de'ang thog ma med pa'i dus sngon gyi skyes pa'i rabs kyi phreng ba rnams su/ nyam nga ba'i 'khor ba'i rgya mtsho kun rtog gi rlabs brgya kun tu 'khrugs pa/ dug gsum gyi klongs dang/ las kyi chu srin gyis bstams shing/ nye bar len pa'i phung pa'i rta gdong gis yongs su skor ba'i nang du bying ba'i gnas tshul gyi cha shas ma lus pa ni sgrib med gzigs pa'i ye shes kyi spyod yul can dag gis ji lta ji snyed du mkhyen pa las/ bdag lta'i sems can ma rig pa stug po'i mun pa'i khung bur gnas pa'i rang rgyud pa dag gis/ blun mos khyo ngo mi mtshon pa bzhin dpag par mi nus pas/ mi chos bla ma dang 'brel ba'i nyes ltung gi las mi zad pa ci'i phyir lhur len/ shes ldan dag/ thog ma med pa'i 'khor ba nas bsags pa'i las nyon gyi khur cung zad kyang ma bri bar/ chos la brten pa'i las sgrib 'bad med de sgrub pa ni gnyen po'i sman dug tu 'gyur ba dang cis te mi 'tshungs/ 'on kyang 'dir pha ma'i nyer len gyis skye ba yongs su gzung ba/ gzhon nu'i kun spyod da lta'i ye shes la gsal ba/