R1: chos kyi rje thams cad mkhyen pa rdo rje gdan pa chen po kun dga' rnam rgyal dpal bzang po'i rnam par thar pa ngo mtshar rin po che'i gter mdzod/ {bod yig glog rdul dpe cha/}
[B:54a]zhing gzhan du sprul pa'i sku gzhan dang gzhan gyi bkod pa rnams nyid kyi thugs la mngon par bzhed par gyur pa de'i tshe/ zhing 'di'i sgyu [A:179]'phrul gyi bkod pa rnams rim gyis brtul te/
sku'i nye 'khor na 'khod pa'i dag pa'i gdul bya thun mong ma yin pa lhag bsam rnam par dag pa'i dad 'dun ches lhag pa mi'i dbang po lha sras lha dbang kun dags gtso mdzad rdo rje'i slob bu nyung shas rnams la/ zab pa dang rgya che ba'i bka' gsang rmad du byung bas lung ston pa dang / rjes su gnang ba'i sgo nas bstan pa rin po che spyi dang khyad par du gyur pa dag ji ltar 'dzin cing skyong ba'i tshul rnams legs par gsungs shing rmad par mdzad do/ / lhag par zla ba de'i nyer gsum gyi nyin'du khang du 'dus pa'i tshogs la "gtor skyong rgyas par gyis" zhes pa dang / sku mdun nyid du chos skyong gi sku byin rlabs can dgram
pa dang / mchod gtor spyan gzigs sogs legs par bshams te/ thugs sras kun
dga' rgyal po dang / slob dpon bsod nams rgyal po gnyis la "bskang gso mnga' gsol legs par gyis" shig bka' bstsal zhing / rje btsun nyid kyis kyang thugs 'dun ched du gtad de bstan pa bstan 'dzin dang bcas pa chos skyong la gnyer gtad gnang / de dag gi rten mchod gtor dang [A:180]bcas pa ni sus kyang g.yo ma nus pas deng sang gi bar du gnas de nyid na brtan par bzhugs so/ / de rjes nas 'dir snang gi bka' cung yang mi bstsal bar thugs dam gyi ngang nyid nas nyer bzhi'i thun tha ma la phyogs pa tsam nas/ bla ma yi dam sangs rgyas byang sems mkha' 'gro chos skyong dang bcas pa mngon sum du gyur nas dbang bskur ba dang / lung ston pa dang / bsnyun gsol zhing dbugs dbyung ba dang / bstan pa bsrung bar zhal gyis bzhes pa la sogs pa dag pa'i snang ba rab 'byams su gyur par snang ste/ 'gro ba mgon med pa rnams kyi gnyen gcig pu/ thugs rje mnga' ba thugs rje'i bdag nyid/ bla ma rje btsun thugs rje chen po de nyid spyan gyi gzigs pa nam mkha'i dbyings su lta stangs su mngon par phyogs pa dang / sku'i bkod pa bde ba'i rnam par rol ba dang / gar gyi rnam