R1: chos kyi rje thams cad mkhyen pa rdo rje gdan pa chen po kun dga' rnam rgyal dpal bzang po'i rnam par thar pa ngo mtshar rin po che'i gter mdzod/ {bod yig glog rdul dpe cha/}
[B:7b]'dzin zhes bya ba chu pho byi ba'i lo smin drug gi zla ba'i tshes bcobcwa brgyad kyi tho rengs yul gru chen po dge ba'i mtshan ma bcu dang ldan zhing mkhas grub grwa pa mngon shes sogs bgrang ba las 'das pa byon pa'i sa/ g.yo ru grwa zhes pa'i sa'i thig le dpal 'byor 'dod dgu ma lus pas yongs su gang ba 'chi med kyi grong khyer sa la 'phos pa lta bu'i dpal rgyal chen gling gi khang bzang du yum la gnod pa med cing bde ba'i ngang nas/ rgyal bu don thams cad grub pa ji bzhin du sku mtshan dang dpe byad kyis spras pa lta bu blta bas chog mi shes pa zhig bltams so/ / de'i tshe phyogs bcu'i rgyal ba sras dang bcas pa dbyings su dgyes shing / gtsang rigs kyi lha rnams kyis kyang me tog gi char dang / 'ja' 'od kyi gur phub ste/ dus kyi 'bru bcud rnams kyang ches lhag par rgyas pa sogs dge ba'i mtshan ma phul du byung zhing / lugs dang mthun pa'i btsas ston yang rgya chen por mdzad/
sngar yum gyis mkhan chen sgrib pa nag po'i drung du [A:19]bsrung ba lnga'i dbang tshar mang du gsan pa dang / de dus sku'i rim gror yang gzungs grwa lnga sgrog pa gtso bor mdzad pas mtshan yang grwa lnga rgyal po zhes par mnga' gsol lo/ /de nas rigs gtsang zhing rnam dpyod dang ldan pa'i rig mas pang na 'tsho ba dang / nu zho bsnun pa dang / dri ma 'khrud pa dang / zho shas 'tsho ba sogs kyi ma ma dang gzhan yang ji ltar 'os pa'i rim gro pa dang / zhabs 'bring pa dag nye bar bskos pa las sku'i skyed legs par bsrings te/ mtsho'i nang gi padma dang dkar phyogs kyi zla ba'i dkyil 'khor ltar ches cher gsal zhing rgyas par gyur to/ / de la 'di skad ces bya ste/drag po'i 'thor rlung khyab 'jug mtshon cha yis/ /stug po'i sprin rum dral las zla dbang bzhin/ /lhums kyi pad rdzing dbus nas gzhon nu'i sku/ /mtshan dpe'i 'dab stong bkra ba'i 'dam skyes 'khrungs/ /de tshe sa chen rnam pa drug g.yos shing