R1: chos kyi rje thams cad mkhyen pa rdo rje gdan pa chen po kun dga' rnam rgyal dpal bzang po'i rnam par thar pa ngo mtshar rin po che'i gter mdzod/ {bod yig glog rdul dpe cha/}

  • Pagination (Witness B): 41b
[B:41b]g.yon na sngags chas khang pa ka bzhi mar/ bcom ldan 'das rdo rje phur ba'i phra phyag gi zhal 'bag sogs/ gsang sngags gsar rnying gi phyag bzhes skyong ba la dgos pa'i cha lag ma tshang ba med pas gang ba/ gtsang khang gi ngos gnyis la 'dzam gling mdzes par byed pa'i rgyan drug mchog gnyis/ seng gdong g.yas g.yon la rje sa skya pa chen po dang rnal 'byor dbang phyug zhal sprod/ bar skor gyi phyi nang la rgyal ba mi 'khrugs pa dang / sangs rgyas 'od dpag med gnyis stong sku dang bcas pa rnams ri mor bkod pa'o/ / glo 'bur lho ma sngags khang chen mo ka chen gnyis kyis phub pa'i gud na bcom ldan 'das rdo rje 'jigs byed rwa lugs dang mthun pa zhal phyag yongs su rdzogs pa rngam zhing 'jigs pa'i nyams can dang / g.yas phyogs nas rim pas/ bcom ldan 'das rdo rje gzhon nu [A:134]phrin las thams cad la dbang 'byor ba dang / bka' srung bdud rgyal nag po thod pa'i phreng ba dang / dam can gyi srung ma dkar mo nyi zla nyi stong gi phreng ba can rnams/ g.yon phyogs nas rim pas/ dpal dus kyi 'khor lo'i srung ma bcom ldan 'das rdo rje shugs khro bo'i rgyal po rnams la dbang bsgyur ba dang / 'chi bdag yi dwags kyi bdag po chos rgyal las kyi gshin rje dang / skye 'gro kun gyi srog la dbang byed pa lha mo nag mo tsa muNDi rnams sgrub pa po la rnam gnyis kyi dngos grub stsol zhing / nyams pa'i ru tra sgrol ba la dpa' ba'i nyams dang ldan par/ dur khrod 'jigs su rung ba'i bkod ris phun sum tshogs pa'i dbus na bzhugs pa'i spyan sngar mchod gtor spyan gzigs sogs bsam gyis mi khyab pa dang bcas pa'o/ / 'di'i gtso bo'i rus shing 'dzugs pa'i bka' bkod gnang / yi dam gyi sku 'di myur du 'grub par 'gyur bas/ grub dus lan 'phrod kyis zhes bka' stsal nas/ rje btsun dam pa 'di nyid gzims spyil dga' ldan du sku mtshams bcad rgya la bzhugs pa gnang ngo / / de nas zla ba gcig gi khongs su sku yongs su rdzogs pa [A:135]legs par grub ste/ mtshon gdan spyan 'byed tsam byas nas/ 'di ltar bgyis yod pa'i zhu ba phul dus/ dgyes pa chen po dang bcas te phyag phebs nas/ yi dam gyi byin rlabs dang rig byed kyi nyer len zung du