[A:279]la phyogs ris med kyis nam mkha' gon/ sgom pa la gsal 'grib med kyis nyi ma khur/ spyod pa la thog brdug med kyis rlung la zhon/ 'bras bu la blang dor med kyis gser gling ltos/ de ltar rtogs pa'i rnal 'byor la/ lta ba la lta rgyu gda' ye/ bsgom pa la bsgom rgyu gda' ye/ spyod pa la spyod rgyu gda' ye/ 'bras bu la bsgrub rgyu gda' ye/ des na rig pa gshis thog tu sgyel/ mtshan ma rang grol du thong / phyi nang gi 'dzin pa shigs/ bzang ngan gyi blang dor spangs/ chags zhen gyi 'dzin pa khrol/ bzang 'dod kyi nga rgyal thong / 'gran sems kyi phrag dog khrol/ zhe sdang gi me chen gsod/ gti mug gi ma rig pa sangs/ byar med kyi ngang la yengs med du zhog gnyis 'dzin gyi blo ni nam mkha'i dbyings su rgyas thob/ don la bsgom rgyu med kyis rang sar zhog 'o de lta bu'i gang zag gis/ bskyed rim bsgom na yi dam lha ru 'gyur/ /rdzogs rim dran na gzung 'dzin mtshan ma zhig /zung 'brel 'dod na bar snang 'ja' tshon ltos/ /don go mthong na tha mal chos mi ltos/ /ma mthong bar du bka' brgyud bla ma bsten/ / chos spyod byed na rang 'dod zhen pa spangs/ /mi 'jig go cha 'dod na sgo gsum lha ru bsgyur/ /gzhan don byed na 'gro la phan sems bskyed/ /rang don bsgrubs na 'du 'dzi g.yeng ba spongs/ /dgra bgegs 'dul na rtsa bral snying rje bskyed/ /phyi ma bde 'bras 'dod na da lta dka' ba spyod/ /'gro ba dbang du sdud na bdag bas gzhan gces kyis/ /snyom las dran na 'chi ba mi rtag bsgom/ / chags zhen 'dzin pa byung na rmi lam sgyu ma bsgom/ /bar chad bdud kyis bred na rang sems gtan la phob/ /chos bzhin byed na chos min thams cad spong / /nga