[A:143]du mas gang ba'i mtha' 'khob kha ba can gyi rgyal khams der/ ma 'ongs pa'i dus su dam pa'i chos nyi ma shar ba lta bu zhig dar zhing rgyas par 'dug ste/ sems can de rnams kyang thar pa byang chub kyi lam la 'god par 'gyur ro/ / mtha' 'khob de 'dul ba'i gnyen po ni 'phags pa spyan ras gzigs dbang phyug yin no/ /de gang zhe na/ 'phags pa spyan ras gzigs dbang phyug des sngon byang chub sems dpa'i spyod pa spyad pa'i tshe/ sangs rgyas stong gi spyan sngar smon lam btab ste/ bdag gis dus gsum sangs rgyas gang gis kyang zhabs kyis ma bcag pa'i gnas/ mtha' 'khob kha ba can gyi rgyal khams na yod pa'i sems can 'dul dka' ba de rnams thar pa byang chub kyi lam la 'khod par gyur cig mtha' 'khob de yang bdag gis 'dul ba'i zhing du gyur cig bdag 'dre srin la sogs sems can de dag thams cad kyi pha ma lta bur gyur cig 'gro ba sgrol ba'i ded dpon lta bur gyur cig mun pa sel ba'i sgron me lta bur gyur cig dus gsum sangs rgyas la sogs pa de bzhin gshegs pa thams cad kyis gsungs pa'i chos thams cad mtha' 'khob kyi yul der dar zhing rgyas la yun ring du gnas par gyur cig sems can de rnams kyis dkon mchog gsum gyi mtshan thos te skyabs su song nas/ bde 'gro mtho ris kyi lus thob ste/ dam pa'i chos la longs spyod par gyur cig bdag gis gang la gang 'dul gyis sems can rnams smin cing grol nas/ mtha' 'khob de yang rin po che'i gling lta bur gyur cig de kho na nyid du gyur cig ces smon lam btab pas/ de'i smon lam gyi mthu la brten nas/ dus gsum sangs rgyas gang gis kyang ma thul bar