[A:213]nas/ bod la brnyas pa byas ma byin no/ /yang de'i sang lug lnga brgya gtad nas/ 'di rnams sang gi nyi ma la bsad zin pa/ bshas zin pa/ sha zos zin pa/ pags pa mnyes zin pa la lha gcig ster zer ro/ /der bod blon rnams kyis mi res lug re bsad/ so sor bshas/ sha logs shig tu spungs/ pags pa logs shig tu spungs te/ sha lcung mo tsam re tshwa la bsgres shing sgrin la skyur te/ zar bcug pas/ zos zin to/ /pags pa rnams gral mgo nas phur ba re byas btang bas/ gral gzhug tu snum byug ran par byung / yang 'og ma des snum byug ste phur ba re byas pas gral mgor thul lo/ /gzhan ma rnams la bltas pas gang yang ma zin par 'dug go /nged kyi 'di bzhin byung yod/ gzhan gyis ma byung bar 'dug pa/ lha gcig zhu'o byas pas/ da rung rig pa 'gran zer nas ma byin no/ /yang chang ben brgya gtad nas/ 'di rnams sang gi nyi ma phyed tshun la 'thung zin pa/ ma bor ba/ ma bzi ba su byung ba la lha gcig ster zer ro/ /yang mgar gyis bod blon rnams la snod chung chung re btsug nyung re drangs te/ thog mar hub re 'thung cig byas pas/ 'thung zin pa/ ma bo ba/ ma bzi ba byung nas/ gzhan rnams la bltas pas/ phor pa chen po chang gis bkang ste/ 'thung ma zin dogs nas khrog rgyab pas/ bzi zhing skyugs te bo 'dug go /yang nged kyis 'di bzhin byung yod/ gzhan gyis ma byung bar 'dug pas/ lha gcig zhu'o byas pas/ da rung rig pa 'gran zer nas/ bod la brnyas pa byas ma byin no/ /yang rta ma brgya/ bu brgya gtad nas/ 'di tsho ma bu phyogs gcig tu ngo shes pa la lha gcig ster zer ro/ /yang gzhan gyis ma shes/ mgar gyis rta ma bu rnams phyogs