[A:213]ནས། བོད་ལ་བརྙས་པ་བྱས་མ་བྱིན་ནོ། །ཡང་དེའི་སང་ལུག་ལྔ་བརྒྱ་གཏད་ནས། འདི་རྣམས་སང་གི་ཉི་མ་ལ་བསད་ཟིན་པ། བཤས་ཟིན་པ། ཤ་ཟོས་ཟིན་པ། པགས་པ་མཉེས་ཟིན་པ་ལ་ལྷ་གཅིག་སྟེར་ཟེར་རོ། །དེར་བོད་བློན་རྣམས་ཀྱིས་མི་རེས་ལུག་རེ་བསད། སོ་སོར་བཤས། ཤ་ལོགས་ཤིག་ཏུ་སྤུངས། པགས་པ་ལོགས་ཤིག་ཏུ་སྤུངས་ཏེ། ཤ་ལྕུང་མོ་ཙམ་རེ་ཚྭ་ལ་བསྒྲེས་ཤིང་སྒྲིན་ལ་སྐྱུར་ཏེ། ཟར་བཅུག་པས། ཟོས་ཟིན་ཏོ། །པགས་པ་རྣམས་གྲལ་མགོ་ནས་ཕུར་བ་རེ་བྱས་བཏང་བས། གྲལ་གཞུག་ཏུ་སྣུམ་བྱུག་རན་པར་བྱུང༌། ཡང་འོག་མ་དེས་སྣུམ་བྱུག་སྟེ་ཕུར་བ་རེ་བྱས་པས་གྲལ་མགོར་ཐུལ་ལོ། །གཞན་མ་རྣམས་ལ་བལྟས་པས་གང་ཡང་མ་ཟིན་པར་འདུག་གོ །ངེད་ཀྱི་འདི་བཞིན་བྱུང་ཡོད། གཞན་གྱིས་མ་བྱུང་བར་འདུག་པ། ལྷ་གཅིག་ཞུའོ་བྱས་པས། ད་རུང་རིག་པ་འགྲན་ཟེར་ནས་མ་བྱིན་ནོ། །ཡང་ཆང་བེན་བརྒྱ་གཏད་ནས། འདི་རྣམས་སང་གི་ཉི་མ་ཕྱེད་ཚུན་ལ་འཐུང་ཟིན་པ། མ་བོར་བ། མ་བཟི་བ་སུ་བྱུང་བ་ལ་ལྷ་གཅིག་སྟེར་ཟེར་རོ། །ཡང་མགར་གྱིས་བོད་བློན་རྣམས་ལ་སྣོད་ཆུང་ཆུང་རེ་བཙུག ཉུང་རེ་དྲངས་ཏེ། ཐོག་མར་ཧུབ་རེ་འཐུང་ཅིག་བྱས་པས། འཐུང་ཟིན་པ། མ་བོ་བ། མ་བཟི་བ་བྱུང་ནས། གཞན་རྣམས་ལ་བལྟས་པས། ཕོར་པ་ཆེན་པོ་ཆང་གིས་བཀང་སྟེ། འཐུང་མ་ཟིན་དོགས་ནས་ཁྲོག་རྒྱབ་པས། བཟི་ཞིང་སྐྱུགས་ཏེ་བོ་འདུག་གོ །ཡང་ངེད་ཀྱིས་འདི་བཞིན་བྱུང་ཡོད། གཞན་གྱིས་མ་བྱུང་བར་འདུག་པས། ལྷ་གཅིག་ཞུའོ་བྱས་པས། ད་རུང་རིག་པ་འགྲན་ཟེར་ནས། བོད་ལ་བརྙས་པ་བྱས་མ་བྱིན་ནོ། །ཡང་རྟ་མ་བརྒྱ། བུ་བརྒྱ་གཏད་ནས། འདི་ཚོ་མ་བུ་ཕྱོགས་གཅིག་ཏུ་ངོ་ཤེས་པ་ལ་ལྷ་གཅིག་སྟེར་ཟེར་རོ། །ཡང་གཞན་གྱིས་མ་ཤེས། མགར་གྱིས་རྟ་མ་བུ་རྣམས་ཕྱོགས་