།ཁྱེད་ལ་དེ་སྐད་བཀུར་བར་བྱ། །ཁྱེད་ཀྱིས་འགྲན་རྒྱུ་དེ་རྣམས་ལ། །རང་ལས་རང་ཉིད་བྱེད་པ་ལ། །དེ་ལ་འགྲན་རྒྱུ་ངས་མི་མཐོང༌། །ཞེས་གསུངས་སོ། །དངུལ་གྱིས་ལྕག་མཚོ་ལ་བཙུགས་ནས། ཁྱོད་ཀྱིས་ལྷ་ཁ་འདིར་རྩིགས་ཤིག་ཟེར་རོ། །ཁྲི་བཙུན་གྱིས་ཀྱང་ལྕག་ཇོ་བོ་ཤཱཀྱ་ལ་གཏད་ནས། ས་ཐང་ཁད་མཉམ་པོ་ཡ་གི་འདྲ་བ་ལ་ངས་ཀྱང་འབྱོངས་མཆི་ཟེར་ནས་ཁྲི་བཙུན་སྐྱེངས་ཏེ། ཀོང་ཇོ་དང་རྒྱལ་པོ་མཇལ་བའི་སྐབས་མ་སྟེར་རོ། །དེ་ནས་བློན་པོ་རྣམས་ཀྱིས་ཐབས་བྱས་ནས་རྒྱལ་པོ་དང་ཀོང་ཇོ་ཞལ་མཇལ་བས། འདི་ལ་སྣང་བ་གསུམ་དུ་བྱུང་བ་ནི། སྐྱེ་བོ་ཐ་མལ་པ་རྣམས་ཀྱིས་འབོལ་བརྩིགས་པ་དང༌། བོན་པོ་མང་པོས་སྣ་མིན་སྣ་ཚོགས་བྱེད་པ་དང༌། སྣ་སྒྲོན་པ་དང༌། འགལ་བ་བརྒྱབ་པ་དང༌། གདན་གཅིག་ལ་བཞུགས་ནས་དབུ་སྐྲ་སྦྲེལ་བ་དང༌། མར་ཁུའི་སྐྱུ་བརྗེ་བ་ལ་སོགས་པའི་སྣང་བ་མང་པ་བྱུང་ངོ༌། །བྱང་ཆུབ་སེམས་དཔའ་རྣམས་ཀྱིས་སྣང་བ་ལ། འཕགས་པ་སྤྱན་རས་གཟིགས་དབང་ཕྱུག་དང༌། རྗེ་བཙུན་མ་སྒྲོལ་མ་ཞལ་མཇལ་ཏེ། འགྲོ་བ་སེམས་ཅན་གྱི་དོན་ཆེན་པོ་བྱེད་པར་གཟིགས་སོ། །དེ་ནས་ཁྲི་བཙུན་གྱིས་དངུལ་ཟམ་ལ་བྱོན། རྒྱལ་པོ་རྩེ་མཁར་ལ་བཞུགས་པ་ལ་བཀའ་བགྲོས་སོ། །ཁོ་མོ་ལྷ་ཁང་གཅིག་བརྩིག་པར་འདོད་ན། རྒྱལ་པོ་ས་ལ་དབང་བ་ཡིན་པས། ལྷ་ཁང་གི་ས་གཅིག་ཞུ་བྱས་པས། རྒྱལ་པོའི་ཞལ་ལས། ཁྱོད་རང་ལ་ལེགས་པ་གཅིག་ཏུ་བརྩིག་པས་ཆོག་གི་རྩིགས་ཤིག་ཅེས་གསུངས་སོ། །ཁྲི་བཙུན་གྱིས་རྟ་པ་མང་པོའི་འཁོར་འཁྲིད། གནོད་སྦྱིན་མང་པོའི་འཁོར་གྱིས་བསྐོར་ནས། དོལ་དང༌། ཡར་ལུངས་སོག་ཁ་ལ་སོགས་པའི་ཡུལ་དགའ་བ་ཐམས་ཅད་དུ་ལྷ་ཁང་གི་རྨང་བཏིང་བས། ཉིན་མི་བརྩིགས་པ་ནུབ་མོ་ཞིག ལྷ་ཁང་བརྒྱ་རྩ་བརྒྱད་བརྩིགས་པ་རྣམས་ཞིག་པར་གྱུར་ཏེ། ད་རེས་ནི་ལྷ་གཅིག་ཀོང་ཇོ་ལ་གྲོས་གཅི་གའདྲི་དགོས། མོ་རྒྱ་ནག་པལ་བརྟག་པ་དང༌། རྩིས་ལ་མཁ་པ་ཡིན་སྙམ་ནས། གཡོག་མོ་དམ་པ་ཞིག་ལ་གསེར་སེལ་མ་བྲེ་གང་བསྐུར་ནས། ཁྱོད་སོང་ལ་ལྷ་ས་བྱེ་མའི་གླིང་ནེའུ་ཆུང་ཆུ་མིག་ཁ་ན། དར་དཀར་ཡོལ་བའི་ནང་ན། ཇོ་བོ་ཤ྄ཱཀྱ་མུ་ནེའི་དྲུང་དུ་རྒྱ་མོ་ཀོང་ཇོ་མཆོད་པ་འབུལ་ཞིང་ཡོད་ཀྱི། དེར་སོང་ནས་གསེར་འདི་ཕུལ་ལ། ཁ་ནིང་གི་དེ་འདྲ་མ་ཟེར་བར། ད་རེས་ལྷ་ཁང་བརྩིག་པའི་ས་ལེགས་པ་ཞིག་སྟོན་ཅིག ངའི་ལྷ་ཁང་འབྱོངས་ཙ་ན་ཁྱོད་ཀྱང་ལྷ་ཁང་རྩིག་ཏུ་གཞུག་གི་བྱ་བ་བསྲིངས་སོ། །གཡོག་མོས་ཀྱང་དེ་སྐད་ཞུས་པས། ཀོང་ཇོས་ཀྱང་ས་ལེགས་པར་བསྟན་ནོ། །དེ་ཡང་སྐྱེ་བོ་མང་པོ་འདུ་བའི་གནས་འདིར་ཡོན་ཏན་བརྒྱད་ཡོད་དོ། །འདིའི་ཕན་ཡོན་འབྱིན་པ་ལ་སྐྱོན་ལྔ་བཟློག་དགོས་ཏེ། ཡོན་ཏན་བརྒྱད་པོ་འདི་ནི། བཀྲ་ཤིས་པའི་རྟགས་བརྒྱད་ཀྱིས་བརྒྱན་པ་ཡོད་དེ། གནམ་འཁོར་ལོ་རྩིབས་བརྒྱད་ཀྱི་འོག ས་པད་མ་འདབ་བརྒྱད་ཀྱི་སྟེང་ན། འཕན་དཀར་གྱི་རི་ལ་གདུགས་འདྲ་བ་ཡོད། ར་ཀའི་བྲག་ལ་སྤྱན་གསུམ་ཉ་འདྲ་བ་ཡོད། རྫོང་བཙན་གྱི་བྲག་ལ་བུམ་པ་འདྲ་བ་ཡོད། གྲིབ་བསེ་སྒྲོམ་གྱི་ཕུར་དུང་དཀར་གཡས་སུ་འཁྱིལ་བ་འདྲ་བས་ཁྱབ་པ་ཡོད། གྲིབ་མདའ་ཡུག་མའི་ཟུར་ན་ཐུགས་རིན་པོ་ཆེ་དཔལ་བེའུ་འདྲ་བ་ཡོད། ཤུན་གྱི་བྲག་ལ་སྐུ་རྒྱལ་མཚན་འདྲ་བ་ཡོད། ཤར་རྩིབས་ཀྱི་རི་ལ་ལྗགས་པད་མ་ཁ་ཕྱེ་བའི་རི་ཡོད། དེའི་སྐྱོན་ལྔ་ནི། ལྷོ་ཕྱོགས་གླ་བའི་ཚལ་ན་འདྲེའྀ་ངན་ཕུང་ཡོད་པ་དེ་གཏོར། ལྷོ་ནུབ་མཚམས་སུ་བཙན་གྱི་རྒྱུ་སྲང་ཡོད་པ་དེ་ཁོག ནུབ་བྱང་མཚམས་ཀྱི་བྲག་ཕུག་ཁ་ལྷོ་ལྟ་ན་མ་མོའི་ཉལ་ས་ཡོད་པ་དེ་ཕྲོགས། བྱང་ཕྱོགས་བྱེ་མའི་གླིང་དུ་ཀླུའི་ཕོ་བྲང་ཡོད་པས། དེ་ཇོ་བོ་ཤཱཀྱ་མུ་ནེས་མནན་ཡོད་ཀྱི། གཞན་ཡང་འབྱུང་བའི་དགྲ་ཡོད་དེ། ཤར་ཕྱོགས་བྱེ་མའི་ལུང་སྟོང་དུ་སྲིན་མོ་འདོམས་བཟེད་པ་འདྲ་བའི་ས་དགྲ་ཡོད། དེར་དབང་ཕྱུག་ཆེན་པོའི་ལིང་ག་ཚུགས། ལྷོ་ཕྱོགས་ཡུག་མའི་རི་ལ་རུས་སྦལ་ནག་པོ་གཟན་ལ་གཞུངས་པ་འདྲ་བ་ཡོད། དེ་ལ་བྱ་ཁྱུང་ག་རུ་ཌ་ཁ་སྟོན། ནུབ་ཕྱོགས་ཤུན་གྱི་བྲག་བདུན་ནག་པོ་བྱ་ར་བྱེད་པ་འདྲ་བའི་ས་དགྲ་ཡོད། དེའི་ཕྱོགས་སུ་མཆོད་རྟེན་བསེ་རུ་རྩིགས། བྱང་ཕྱོགས་ཉ་རན་ནང་བྲན་གྱི་རི་ལ་གླང་པོ་སྟོབས་ཅན་གཡུལ་ལ་ཞུགས་པ་འདྲ་བ་ཡོད་དེ།