དེའི་ནང་གཡས་གཡོན་ན་གནོད་སྦྱིན་གྱི་རྒྱལ་པོ་ཆུ་སྲིན་ཞོན་པ་ཕྱག་ན་གྲི་གུག་དང་ཐོད་པ་ཐོགས་པ། འཇིགས་སུ་རུང་པ། སྐུ་ཤིན་ཏུ་ཆེ་བ་གཉིས་བཞུགས། ལྷོ་བྱང་གི་ལམ་ཞེང་ལ་འདོམ་གསུམ་ཙམ་པ། ཤར་ལ་འདོམ་དགུ་ཙམ། ལྕགས་རིའི་ནང་གི་སྐོར་ལམ་འདོམ་དོ་དོ་ཡོད་དོ། །བྱང་ལམ་ལ་འདོམ་གང་ལྷག་ཙམ་ཡོད། དེ་དག་གི་བར་གྱི་གླིང་ཐམས་ཅད་ནི་རྡོ་དང་སོ་ཕག་ལ་བྱས་པའི་མཆོད་རྟེན་ཅོ་བ་རི་གན་དྷོ་ལ་གྲངས་མེད་ཅིང་བྱིན་རླབས་ཅན་བསམ་གྱིས་མི་ཁྱབ་པ་བཞུགས། །དེ་ནས་ཤར་ངོས་ཀྱི་ལྕགས་རིའི་ངོས། སྒོ་མོ་ཆེའི་ཐད་ཀར་མདའ་རྒྱང་གང་ཙམ་ན། ནཻརཉཛནའི་འགྲམ་ན་དཔལ་ལྡན་མགོན་པོ་བེང་མའི་བཞེངས་སྐུ་སེང་གེའི་སྟེང་ན་བཞུགས་པ། ཕྱག་གཉིས་དབྱུག་པ་དང༌། བེ་ཅོན་ཨོཾ་ཚུགས་སུ་བྱས་པ། སྐུ་ཤིན་ཏུ་ཆཻ་ཞིང་འཇིགས་པ་གཉིས་ཞལ་ཤར་དུ་བསྟན་ནས་བཞུགས། དེའི་མདུན་ཕྱོགས་ཀྱི་དྲུང་ན། སྔོན་ལྟེང་རྒྱས་འོད་སྲུངས་ལ་སོགས་པ་རལ་པ་ཅན་སྟོང་རབ་ཏུ་བྱུང་བའི་ས་ན། རལ་པ་དང་གདུ་བུ་ལ་སོགས་བསྐྱུར་ནས། དེའི་སྟེང་དུ་བྱེ་མ་སྤུངས་པ་ལ་མཆོད་རྟེན་གྱི་གཟུགས་སུ་བྱས་པ་ཆེན་པ་ཞིག་ཡོད། དེ་ནས་རྡོ་རྗེ་གདན་གྱི་ཤར་ཕྱོགས་ན། གཞོན་ནུ་མ་བདུན་དང་མཇལ་ས་ན་མཆོད་རྟེན་བདུན་དང༌། རལ་པ་ཅན་ལྔ་བརྒྱ་བརྟུལ་ཞུགས་པའི་ལ་ན། སློབ་དཔོན་ཀླུ་སྒྲུབ་ཀྱིས་སྒོམ་མཛད་ས་ཡོད། དེའི་བྱང་དུ་མདའ་རྒྱང་གང་ཀླུ་སྒྲུབ་ཀྱིས་ཀླུའི་ཡུལ་བྷོ་དྷི་རྩེ་བསྣམས་ནས་བྱོན་ཏེ། བྱིན་གྱིས་བརླབས་ནས་བཙུགས་པའི་ཤིང་ཕུང་གསུམ་ཡོད། རྡོ་རྗེ་གདན་གྱི་བྱང་ཕྱོགས་ན་སིང་ག་གླིང་པའི་གྲོང་གི་དཀྱིལ་ན། སྔོན་བཅོམ་ལྡན་འདས་རི་བོང་དུ་སྐྱེ་བ་བཞེས་པའི་དུས་སུ། བརྒྱ་བྱིན་དང་ཕྲད་དེ་མེ་ནང་དུ་མཆོངས་པའི་སྐྱེས་རབས་ཀྱི་ས་ན། མཆོད་རྟེན་འདོམ་གང་ཙམ་པ་གཅིག་བཞུགས། དེ་དང་ཉེ་བ་ན་སྔོན་བཅོམ་ལྡན་འདས་བྱ་སྲེག་པར་སྐྱེ་བ་བཞེས་ནས། རི་བོང་གླང་པོ་རྣམས་ཕྱག་ལ་མ་འདུམ་ནས། གང་རྒན་རྩིས་པའི་ཤིང་ཕུང་གི་ཤུལ་ན། མཆོད་རྟེན་འཕང་དུ་འདོམ་གསུམ་ཙམ་པ་གཅིག་དང༌། ཎ྄ཡ་གྲོ་ཏའི་ཤིང་ཕུང་གཅིག་ཀྱང་ཡོད། རྡོ་རྗེ་གདན་གྱི་ནུབ་ཕྱོགས་ལྕགས་རིའི་རྒྱབ་ན་སྔོན་བཅོམ་ལྡན་འདས་བསོད་སྙོམས་ལ་བྱོན་པའི་ས་ན་རྒན་མོ་ཞིག་གིས་ལྕི་བ་གོང་བུ་ཕུལ་བས། དེ་གསེར་དུ་བསྒྱུར་ཏེ་སླར་རྒན་མོ་རང་ལ་གནང་བའི་ས་ན་གོ་པ་ཨུ་རེ་ཞེས་པའི་མཆོད་རྟེན་འཔང་དུ་འདོམ་གསུམ་པ་ཞིག་བཞུགས། རྡོ་རྗེ་གདན་གྱི་ལྷོ་ཕྱོགས་ལྕགས་རིའི་ལོགས་གཏད་ས་ན། གྷེ་པ་རི་ཞེས་པ་ཡོད་དེ། དེར་སློབ་དཔོན་ཀླུ་སྒྲུབ་དང༌། ཐོགས་མེད་བཞུགས་སྐད། དེ་ན་མགོན་པ་བྱིན་རླབས་ཅན་ཆེ་བ་ཞིག་ཀྱང་བཞུགས། དེའི་བདག་པོ་ཁ་ཆེ་བས་བྱེད་དོ། །བོད་ཀྱི་རབ་ཏུ་བྱུང་བ་རྣམས་ཀྱང་དེར་གནས་ཚང་འཆའོ། །དེའི་ཉེ་ལོགས་ལྷོ་ཕྱོགས་ན། སློབ་དཔོན་སངས་རྒྱས་ཡེ་ཤེས་ཞབས་ཀྱིས་བཞུགས་ནས་བསོད་སྙོམས་མཛད་པའི་དུས་སུ་འདག་པ་ལྷུང་བཟེད་རེ་བསྣམས་ནས་བྱོན་ཏེ། དེ་ལ་བཞེངས་པའི་མ་ཏི་བི་ཧ་ར་ཞེས་པའི་གནས་ཤིག་ཡོད་དེ། དེར་རྗེ་དི་པཾ་ཀ་ར་ཤྲཱི་ཛྙ་ན་རབ་ཏུ་བྱུང་བ་ཡིན་ཟེར། དེའི་ཕྱི་ན་སློབ་དཔོན་ཡེ་ཤེས་ཞབས་ཀྱིས་བྱིན་གྱིས་བརླབས་ནས་བཙུགས་པའི་ཤིང་ཨ་རུ་རའི་སྡོང་པོ་ཆེན་པོ་གཅིག་ཀྱང་ཡོད། དེ་དང་ཉེ་བའི་བྱང་ཤར་ན། ཅོ་བ་རིའི་ལྷ་ཁང་ན་སྒྲོལ་མའི་རྡོ་སྐུ་མི་ལངས་པ་ཙམ་བྱིན་རླབས་ཆེ་བ་གཅིག་བཞུགས། དེ་ལ་མཆོད་པ་ཡང་ནར་མར་བྱེད་དོ། །དེ་ནས་ལྷོ་ཕྱོགས་རྒྱང་གྲགས་ཙམ་ན། སྔོན་བཅོན་ལྡན་འདས་གླང་པོ་ཆེར་སྐྱེ་བ་བཞེས་པའི་རབས་ཀྱི་ཤུལ་ན། མཆོད་རྟེན་འཕང་དུ་འདོམ་ལྔ་ཙམ་པ་ཞིག་བཞུགས། རྡོ་རྗེ་གདན་གྱི་ཤར་ཕྱོགས་ཆུ་བོ་ནཻརཛྙངའི་འགྲམ་ན་དྷརྨ་ར་ཙི་ཀ་ཀ་ཞེས་པའི་མཆོད་རྟེན་ཟླུམ་པ་བང་རིམ་ཅན། དེ་ལས་ཆེ་བའི་མཆོད་རྟེན་གཞན་ན་མེད་པ་ཞིག་བཞུགས། དེ་ནི་སྤྱིར་གནས་ཆེན་པ་བརྒྱད་ན་མཆོད་རྟེན་ཆེན་པོ་བརྒྱད་ཡོད་པར་གྲགས་པའི་རྡོ་རྗེ་གདན་ན་ཡོད་པ་གཅིག་ཡིན། དེའི་བུམ་པའི་ནང་ན་བཅོམ་ལྡན་འདས་ཀྱི་སྐུ་གདུང་ཕལླ་གང་བཞུགས་སྐད་དོ། །དེའི་སྐོར་ལམ་སའི་འདོམ་གསུམ་ཚུན་བཅད་དུ་རྡོ་ཐལ་གྱིས་བསྐུས་པ་ཡོད་དོ། །དེའི་ནུབ་ངོས་ཀྱི་སྐོར་ལམ་ན་རྡོ་རིང་ཞིག་བཙུགས་ཡོད་དོ།