།ནམ་མཁའ་ལམ་དུ་བྱས་པ་ལ། །སྒོ་ཆ་བསྡམས་པས་ག་ལ་ཐུབ། །ཟེར་རོ། །དེ་འཕགས་པ་འཇམ་དཔལ་གྱི་སྤྲུལ་པ་ཡིན་པར་རིག་ནས་ཡང་ཡང་དུ་དྲིས་པས་རྒད་པོ་ན་རེ། ང་ཞང་ཞུང་མི་ཡུལ་ནས་འོངས། ཟ་ཧོར་གྱི་ཡུལ་དུ་འགྲོ་ཟེར། ཐག་ཇི་ཙམ་ཡོད་བྱས་པས་ཅི་ཆ་ཡོད་ཟེར། མི་སྣང་བར་སོང་ངོ༌། །དེར་སམ་བྷོ་ཌས་བསམས་པས་རིགས་འ་ཞ་ཡིན་ཟེར་བས་འ་རྙེད། ཞང་ཞུང་ནས་ཡོངས་ཟེར་ཞ་རྙེད། ཟ་ཧོར་ཡུལ་དུ་འགྲོ་ཟེར་བས་ཟ་རྙེད། ཐག་ཇི་ཙམ་བྱས་པས་ཅི་ཆ་ཡོད་ཟེར་བས་ཅ་དང་ཆ་རྙེད་དོ། །རྒྱགས་ཅི་ཡོད་བྱས་པས་ཇ་ཡོད་ཟེར་བས་ཇ་རྙེད། དེར་རྒྱ་གར་ལ་མེད་པའི་ཡི་གེ་དྲུག་གིས་ཁ་བསྐངས་ཏེ། ཀ་མད་སུམ་ཅུ་ཐམ་པ་བྱུང་སྟེ་ད་གཟོད་བོད་སྐད་དུ་བསྒྱུར་བཏུབ་ནས་རྒྱ་ཡིག་ལ་ལས་བོད་ཡིག་ཏུ་བྲིས་ནས་རྒྱ་གར་སྐད་ལས། བོད་སྐད་བསྟན་ནས་སྒྲ་བསྒྱུར་ནས་གཏན་ལ་ཕབ། བཤད་ཉན་དང་སྒོམ་སྒྲུབ་ཀྱི་སྲོལ་ནི་མ་ཐོད་་་དོད་་་་ཌ་འབྲི་བ་དང་ཀློག་པའི་སྲོལ་ནི་མ་ཐོད་་་དོད་་་་དེ། མདོ་སྡེ་དཀོན་མཆོག་སྤྲིན་དང༌། པད་མ་དཀར་པོ་དང༌། ཟ་མ་ཏོག་བཀོད་པ་དང༌། རིན་པོ་ཆེ་འཕྲེང་བ་དང༌། མདོ་ཕྲན་མང་བསྒྱུར་རོ། །དེ་ནས་ལྷ་ཆོས་དང་མི་ཆོས་ཀྱི་གདམས་པ་མང་བསྒྱུར་རོ། །དེ་རྣམས་མཆིམས་ཕུའི་ཕྱག་མཛོད་དུ་བཞུགས་སོ། །ལོ་ཙཱ་བ་ལ་རྒྱལ་པོའི་རྩིས་དང༌། བསྙེན་བཀུར་ནི་ཕྲ་མེན་གྱི་ཡི་གེ་ཆེན་མོ་ཡིག་མཁན་ལ་དར་གྱི་ཡོལ་བ། ཟ་འོག་གི་བླ་རེ། གབ་རྩེའི་གདན། སྤྱན་རས་གཟིགས་ཚོད་དགུ། ཟང་ཟིང་གི་ལོངས་སྤྱོད་བསམ་གྱིས་མི་ཁྱབ་པ་གནང་ངོ༌། །དགེ་བ་ཉམས་བག་ཏུ་སྤྱོད་དུ་ཆུག མཚན་མཆོད་གནས་ཞེས་བྱ་བར་བཏགས་སོ། །ཡི་གེའི་དཔེ་གཅིག་ལྷ་སའི་བྲག་ལོགས་ལ་བཏབ་པ་ནི་སྦལ་ནག་ནག་ལ་རྒྱངས་པ་འདྲ་བ་གཅིག་བྱུང་ངོ༌། །འབྲི་ཀློག་དག་པར་བྱ་བའི་ཕྱིར་དུ་སྒྲའི་བསྟན་བཅོས་དང༌། དག་ཡིག་རྒྱས་པ་ཡང་མཛད་དེ་རྒྱལ་པོའི་ཕྱག་ཏུ་ཕུལ་བས་མཉེས་སོ། །བོད་ཀྱི་ལོ་ཙཱ་བ་ལ་སྔ་བ་དེ་ཐོན་མི་སམ་བྷོ་ཌ་ཡིན་ནོ།།
དེ་ནས་རྒྱལ་པོས་ལོ་བཞིའི་བར་དུ་ཡི་གེ་བསླབས་པས། བློན་པོ་འགའ་ན་རེ། རྒྱལ་པོ་ལོ་བཞིའི་བར་དུ་སྒོ་ཙམ་དུ་མི་ཡོང་བས་གླེན་པ་གཅིག་འདུག་ཟེར་ནས། བོད་སྐྱིད་པ་བློན་པོའི་དྲིན་ཡིན་ཟེར་བས། རྒྱལ་པོའི་བསམ་པ་ལ་བོད་ཀྱི་བློན་པོ་གླེན་པར་བྱེད་ནས་འདི་རྣམས་མི་ཐུལ་ལོ་སྙམ་སྟེ། ཁྱོད་བོད་རྣམས་ནི་རྒྱལ་པོ་གླེན་པ་ཞིག བོད་བདེ་བ་ལ་བློན་པོས་བཀོད་པ་ཡིན་ཟེར། བློན་པོ་ང་ཡིས་བསྐོས་སམ། ཁྱོད་ཀྱིས་བསྐོས། ངས་ཕོ་བྲང་གཅིག་ཏུ་འདུག་ནས་འཕོ་སྐྱས་མ་བྱས་ན། འབངས་དལ་ཞིང་སྐྱིད་པ་ཡིན། ད་ང་ཡིས་ཁྲིམས་བཅའ་ཡིས། ཁྲིམས་མ་བྱས་ན། ཉེས་པ་ཀུན་གྱིས་བྱེད་པས། ངའི་སྲས་དབོན་བློན་གྱི་སྲིད་མེད་པར་འགྲོ། ང་ནི་ཆོས་ཀྱི་རྒྱལ་པོ་ཡིན་པས། ངའི་བཀའ་འཁོར་དུ་གཏོགས་པ་བོད་སྤྱི་མཐུན་ལ་ཆོས་ཁྲིམས་མེད་ན། ལས་མི་དགེ་བ་བཅུ་སྤྱད་པས། ངན་སོང་གསུམ་དུ་སོང་ནས་སྡུག་བསྔལ་ལས་ཐར་པ་མེད་པའི་གནས་སུ་སྐྱེ་བ་ཡིན། ད་ངའི་མངའ་རིས་སུ་གཏོགས་པས་འཐབ་མོ་བྱས་ནས་སྲོག་བཅད་ནས་བསད་ན་སྟོང་འདོད་དོ། །ཕན་ཚུན་མ་རྐུ་ཞིག མ་བྱིན་པར་བླངས་ན། བདུན་འཇལ་དངོས་དང་བརྒྱད་འདོད་དོ། །འདོད་ལོག་གཞན་གྱི་ཆུང་མ་ལ་བྱི་བྱས་ན། སྨད་འཆལ་འདོད་དོ། །བརྫུན་དུ་མ་སྨྲ་ཞིག བརྫུན་སྨྲས་ན། ལྷ་ཀླུ་གཉན་དགུ་ལ་ཡང་བཅོལ་ནས་བྲོ་འདོར་དུ་འཇུག་གོ་བྱ་བ་ལ་སོགས་པའི་དགེ་བ་བཅུའི་ཁྲིམས་བཅས་ཏེ། བཀའ་ཆེམས་ཀྱི་ཡི་གེ་མང་པོ་མཛད་ནས། སྔ་དྲོ་གཅིག་ཏུ་ཁྲིམས་ཀྱིས་བཀའ་ནན་བསྩལ་ཏེ། བཀའ་ཤོག་མང་པོ་བསྒྲགས་ནས། རྒྱལ་པོ་དེས་འཇིག་རྟེན་པ་དང་སྒོ་བསྟུན་ཏེ། སེམས་ཅན་གྱི་དོན་མཛད་པས་ཐམས་ཅད་མགུ་སྟེ། རྒྱལ་པོ་འདི་ཐུགས་དྲང་ལ་སྒམ་པ་ཞིག་འདུག་གོ་ཞེས་ཟེར་ནས་མཚན་ཡང་སྲོང་བཙན་སྒམ་པ་བྱ་བར་གྲགས་སོ། །དེ་ནས་བོད་བློན་པོ་འཚལ་རིས་དེ་ནས་ཙམ་ཡང་མ་བསྒྱུར་བས་རྒྱལ་པོའི་ཐུགས་ལ། ངས་ཁྲིམས་བཅས་པ་ཡང་བཙན་པར་གྱུར་པས། དེ་ཡིས་དམ་པའི་ཆོས་ཀྱི་སྲོལ་གཏོད་དོ་ཞེས་གྲགས་་་བསྒྲགས་་་་སོ། །ད་ནི་ཆོས་ཀྱིས་སེམས་ཅན་རྣམས་འདུལ་དུ་བཏུབ་པར་འདུག་པས། ཆོས་ཁྲིམས་དགེ་བའི་ལས་སྟབས་དང་ཆོས་བྱ་སྙམ་མོ། །ཆོས་བྱེད་པ་ལ་རྟེན་ལྷ་གཅིག་དགོས་ཏེ།