tshogs snang sgyu ma ltar/ /don rnams rtogs bzhin thugs rje chen po yis/ /don mdzad rgyal po mes dbon rnams phyag 'tshal/ /chos kun gdod nas skyon med mkha' ltar rnam dag gzigs/ /gnyis su med pa'i byang sems bdud rtsi'i chu/ /rgya mtsho'i
('jings)
ltar rgya che zab yangs pa/ /mkha' mnyam 'gro ba 'chi med dbyings la 'god mdzad pa'i/ /sgra bsgyur gong ma bka' drin can gyi zhabs la 'dud/ /'khor dang mya ngan 'das pa'i yon tan rgya mtsho yis/ /rang gzhan ma lus pa rnams smin dang grol mdzad pa'i/ /sangs rgyas byang chub sems dpa' thams cad kyis/ /sems can snyigs ma dus la brtse dgongs la/ /pha la phar mi 'dzin cing ma la mar mi 'dzin/ /shin tu mi srun 'gro ba mang po dang / /dus snyigs tshe lo brgya pa dang / /nyon mongs snyigs ma drug dang rtsa ba'i nyon mongs dang / /phrag brgya'i grangs dang rags pa dang / /lta ba'i snyigs ma stong pa chad lta phyogs gcig dgag /bdag lta shas che phyi pa mu stegs dang / /longs spyod snyigs ma dbul zhing phongs pa 'byor mi ldan/ /de 'dra'i dus la dgongs te ston pa'i bstan pa dang / /mtshan tsam thos pas bsod nams dpag med gter gyur pa/ /dus rnams rtag tu bka' drin rjes su dran par byas/ /chos 'byung me tog snying po sprang rtsi'i bcud/ /blo gsal rig pa bung ba lta bus blangs/ /mkhas rnams skal ldan rin chen snod brgyud pa'i/ /snga rabs chos 'byung lo rgyus ji lta ba/ /mdo rgyud gsung rab bka' chems rim pa bzhin/ /bstan pa snga phyi dar ba'i yi ge rnams dang ni/ /mkhas pa'i gsung rab rim par rab brgyud pa/ /yi ge 'thor ba thams cad phyogs gcig tu/ /nyang ral bdag gis ma nor rim bzhin 'god/ /
spyir 'gro ba yongs la bka' drin che ba ni/ dus gsum gyi sangs rgyas dang byang chub sems dpa' lags/ de yang ji ltar bka' drin che na/ dang po byang chub mchog tu sems bskyed/ bar du 'khor ba'i rgya mtsho ma stongs kyi bar du sems can thabs cad rnam mkhyen sangs rgyas kyi sa la 'god pa'i go cha chen po rab tu gyon nas/ bskal pa dpag tu med par bsod nams dang ye shes kyi tshogs bsags/ tshogs gnyis kyi 'bras bu sku gsum ye shes lnga shar nas 'khor ba ma stongs bar du 'gro ba'i don la sku gsung thugs yon tan 'phrin las kyis 'gro ba ma lus pa byang chub gsum la 'god pas bka' drin che ba lags/ mi mjed 'jig rten khams la bka' drin che ba ni ston pa sangs rgyas shAkya thub pa lags/ de yang ji ltar bka' drin che na/ snyigs ma lnga dang ldan pa'i zhing khams 'dir/ tshad med thugs rje chen pos khyab par mdzad nas dang po byang chub mchog tu sems bskyed/ bar du brtson 'grus kyi stobs dang shugs kyis dka' thub dpag tu med pas bskal pa grangs med gsum du tshogs bsags pa/ grangs med ces pa ni grangs kyi gnas gzhan drug cus bgrang bar mi nus pa ste/ (so so skye bo yi sa la bskal pa grangs med cing / sa dang po nas bdun pa'i bar la gcig sa brgyad pa dgu pa bcu pa dag pa sa gsum la grangs med gcig tu slob ste/ mdo sde rgyan las/ bskal pa grangs med nges 'byung nyid/ /mos pa rnam par 'phel byed pa/ /ji ltar chu yi rgya mtsho bzhin/ /dge chos rnams kyi yang dag rdzogs/ /zhes so/ /so so'i sgom gnyis la grangs med gcig sbyor/ sa gsum nas sangs rgyas