[A:116a]'jigs shig ces dbugs phyung nas rang nyid kyis ral phub bzung ste/ mdun bsus nas phub bskor bas 'od chen po byung / de'i dmag gis mig lta ma bzod par byas/ ral gri phyung bas dmag tshogs kyis sa gzhi gang bar mthong ste phyir bros te song ngo / /der 'bangs rnams sngar bas kyang gus par gyur to/ /de nas yang dus ring po zhig na 'khor ba las yid byung nas rang gi sras rgyal por bkod de so ma pu ri dur khrod kyi gtsug lag khang bya ba de na he ru ka rang byung gi sku bzhugs la/ gnas de na gnyis ka'i dge 'dun yod pas rang gi zhang po ni mkhan po/ ma ni dge 'dun ma dag gi zhal ta byed pas/ zhang po'i thad du phyin te rab tu byung ngo / /der klog pa la brtson par yod pa'i tshe/ nyin gcig bud med skra li ba sha sngo la sma ra ser khyug ge ba zhig byung ba la cung zad yengs/ des bos te khyod klog pa de nyan par 'dod dam zer/ mkha' 'gro mar shes nas nyan par 'tshal lo zhes zhus pas/ 'di ni mtshan nyid pha rol tu phyin pa'i lugs te/ de ni lam bgrod dka'/ dka' tshegs che/ bar chad mang bas de las rdzogs pa'i sangs rgyas rnyed par dka' 'o/ /'bras bu sngags kyi theg pa ni bgrod par sla/ tshegs chung / bar chad nyung ba yin pas/ de'i sgor bcug go gsung / der dpal 'khor lo sdom pa 'byung ba'i dkyil 'khor mdun gyi nam mkha' la sprul nas dbang bskur/ tha mal gyi zhen pa spang ba'i phyir bskyed rim/ lha la zhen pa spang ba'i phyir rdzogs pa'i rim pa bstan nas/ da ni smyo ba skad gyis la rtags cha lugs bor nas gsang bas nyams su long zhig zer nas mi snang ngo / /de ni bka' babs dang po ste/ rje btsun mar pas/ ma skal ba bzang mos rjes gnang ba'i/ /byin rlabs kyi chu rgyun ma chad pa'i/ /dbang bzhi'i don la ngo sprod mdzad/ /ces gsungs/ des ji ltar bsgo ba ltar mdzad de sgom pa la brtson yang khyad par ma thob nas/ slob dpon 'phags pa mjal bar 'dod de lho phyogs su byon no/ /be darbha'i mi rnams la dris pas dpal gyi ri la bzhugs so zer/ der byon pa'i lam nags kyi mthongs shig na spyil po gdugs lta bur khyil le 'dug pa mthong ste/ der byon pas de'i nang na rnal 'byor pa zhig gang la'ang ma brten par bzhugs 'dug pas/ ci byed pa