[A:117a]yin dris pas/ slob dpon gyi zhal nas dri za rnams la chos shod gsungs nas bsdad pa yin/ khyod su byas pas/ ma taM ki'o/ /'tsho ba sus sbyor/ nags kyi lha mos so/ /slob dpon gar bzhugs dris pas gshegs so zer/ bdag rjes su 'dzin par zhu byas pas/ gnang ste gsang ba 'dus pa'i dkyil 'khor sprul nas dbang bskur/ rgyud man ngag dang bcas stsal/ de bzhin ArYa de wa la'ang gsan zer/ der bskyed pa'i rim pa mthar phyin/ rdzogs pa'i rim pa la drod thob tu nye ba na/ rgya gar shar phyogs bhangga lar log ste bzhugs pa'i skabs nag po spyod pa byon pa la 'khor lo bde mchog lugs gsum gyi gdam ngag thams cad gsan/ de'i slob ma rnam rgyal zhabs la'ang gsan/ dha ri ka pa dang rdo rje dril bu gnyis kyis kyang rjes su bstan pa thob skad/ der drod rtags legs par thob ste/ de kho na nyid mngon du ma gyur pas/ u rgyan du slob dpon lwa ba'i na bza' can dang mjal te grub pa dang snying po'i skor gyi gdam ngag gsan/ tsArYa klu sgrub lwa ba pa/ /ma ti skal ba bzang mo ste/ /bka' babs bzhi yi bla ma bsten/ /zhes so/ /der slob dpon gyis bhangga lar song la til sbru ba'i tshul gyis lo bcu gnyis su rtogs pa skyongs shig dang / de kho na nyid mngon sum du byas nas yul 'khor de'i mi dang bcas pa thams cad mkha' spyod kyi dngos grub thob par 'gyur ro/ /zhes lung bstan pa bzhin bhangga la'i panytsma pa na 'dod pa lnga 'du ba'i tshong 'dus su byon nas smad 'tshong ma zhig gi khol po byas/ 'bras sbru ba'i tshul gyis bsgrubs pas mthong lam gyi ye shes skyes/ der mi rnams kyis khol po de res 'od kyi phung po gcig la mar me bcu gnyis bskor ba/ res bud med bcu dgus bskor ba zhig tu mthong / res dge slong / res rnal 'byor pa zhig tu mthong nas/ de dag gis smad 'tshong ma la bsnyad pas/ de 'gyod pa skyes nas bshags par 'ongs la/ gtam des ya mtshan grong khyer gyi skye bo thams cad der tshogs pa la/ slob dpon na re/ nga nyid kyi sdig pa sbyang ba yin gyi/ khyod la nyes pa med do/ /gang zhig snying por gyur pa til gyi mar/ /lhan cig skyes pa gnyug ma'i ye shes te/ /'gro ba kun gyi snying la yod gyur kyang / /bla mas ma mtshon rtogs par mi nus pa/ /rmongs pas til la yod pa ngo shes kyang / /rten cing