[A:186a]khyod mi chen rnams kyis mdun ma mdzad de 'ong dgos zhus byang lam brgyud 'ong ba jo bos mkhyen/ nga'i u pa si ka sleb ces dgyes dgyes mdzad thugs yid 'dres so// // ! gsum pa dbus gtsang du 'byon tshul ni/ 'brom gyis dbus kyi phyogs na lha sa bsam yas sogs gtsug lag khang dge 'dun stong phrag mang po yod pa'i bsngags pa brjod pas/ jo bo'i zhal nas tshangs par spyod pa grangs mang po de tsam rgya gar na'ang med/ dgra bcom pa'ang yod mchi gsung phyogs gtad de phyag mdzad/ des spobs pa rnyed dbus su 'byon par gsol/ kho bo dge 'dun gyi bka' byung na 'gro gsungs/ lo chen la lo tsAr 'gro dgos gsungs pas/ dbu dung lta bu gzigs phul mtshams kyi dam bca' mdzad de mkha' spyod du gshegs kyang zer/ gshegs nas gdung bya mo'i sgo nga tsam gsum byung ste/ de yal zer ro/ /der dbus su/ shing rta'i dbyibs 'dra 'dzam gling gi sogs zhu 'phrin brdzangs pa ka ba la 'phrod/ des do dam cher bgyis rgyal gyi zhang chen po la sogs la gros zhus nas jo bo gdan 'dren du 'byon par brtsams pa'i tshe khu ston khong rang yi ge na mi 'dug pas ma dgyes nas sngon la ngas mjal ba zhig bya snyam brgyugs/ des gzhan rnams la lcags bcug pa bzhin song / dbus gtsang gi mi chen thams cad dpal thang du phebs/ skyid grong du sngar zhu ba song bas jo bo dpon g.yog kyang der phebs/ bod ston rnams zhwa sna ring na bza' ber dang rtar bcas pa rgyang nas gzigs pas/ jo bos u pa si ka mi ma yin mang po byung gsungs dbu gtums/ de nas khong rnams kyi rta babs/ zhwa dang ber bzhag snam sbyar gsol ba sha stag tu byas nas byung bas/ jo bo mnyes nas dge 'dun la spyi phyag mdzad/ de nas bod ston rnams log jo bo dpon g.yog rim gyis 'byon par byas te/ lho byang myang rong dbus kyi sol nag thang po che bsam yas sogs su 'phrin las bskyangs nas/ 'brom gyis zhang ston la yi ge btang / khong gis snye thang du spyan drangs/ der bzhugs gdan chags sa'i ma mo mdzad/ bur du dgon pa ba la sogs pa'i sgom grwa btsugs/ rngog legs shes lha sa dang / rngog byang chub 'byung gnas kyis yer pa/ ka ba chen pos 'phan yul du spyan drangs/ slar snye thang du log ste sangs rgyas kyi bstan pa rin po che