[A:༩བ]གཉིས་ལ་གསེར་མང་པོ་གནང་པས་དད་སྟེ། རྒན་པོས་ཉེ་གནས་བྱས། ཆོས་བསྟན་པས་སློབ་དཔོན་ཀླུའི་བྱང་ཆུབ་ཅེས་མཆོག་བརྙེས་པར་གྱུར་ཏོ། །དེ་ནས་ཤར་ཕྱོགས་ཊ་ཝེ་ས་དང་། ཡུལ་ར་དྷར་ཡང་བྱོན་ནས་ལྷ་ཁང་མང་པོ་བཞེངས། དེ་ནས་སེང་ལྡེང་གི་ནགས། དྲི་ལྡན་གྱི་འདབས་སུ་བྱོན་ནས། དྲིལ་བུ་ལྟ་བུའི་བྲག་གསེར་དུ་བསྒྱུར་བར་རྩོམ་པའི་ཚེ། མ་ཧེ་འཚོ་བའི་བྱིས་པ་ཅིག་ནགས་ཀྱི་ནང་དུ་ཕྱིན་པ་ན། དེ་ལ་རྒན་མོ་གཅིག་སྣང་བ་ན་རེ། ཁྱོད་ཀྱི་བཙུན་པ་མ་ཀི་ཚོའི་ནང་ན་ཀླུ་སྒྲུབ་བྱ་བ་ཡོད་ཀྱིས། དེ་ལ་ཁྱོད་རང་གི་མ་རྒན་མོ་ན་རེ། རེ་ཤིག་འདིར་ཤོག་གྱིས་དང་ཟེར། ཕྱིན་པས་གང་ཡིན་ངོ་མ་ཤེས། སླར་ལོག་འོངས་པས། ཏ་ལའི་ལོ་མ་བཟུང་ནས་ཁ་ལྟ་བྱེད་པ་དེ་ཡིན། ཆོས་གོས་ཀྱི་རྒྱབ་ན་ཡི་གེ་ཨ་གཅིག་ཀྱང་ཡོད་གསུངས། དེར་དེ་ལ་དེ་སྐད་བྱས་པས། ཀླུ་སྒྲུབ་ཀྱི་བྱོན་པའི་ཚེ་དེར་སྒྲོལ་མ་ལྷ་ལྔ་ཞལ་གཟིགས། དེའི་ཞལ་ནས། ཁྱོད་ཀྱིས་གསེར་འགྱུར་གྱིས་སེམས་ཅན་གྱི་དོན་བྱས་པ་ཡང་བཟང་སྟེ། དེ་བས་ཀྱང་མཆོག་བསྒྲུབ་ན་སེམས་ཅན་གྱི་དོན་ཆེན་པོ་དེ་ལས་འབྱུང་བས། དཔལ་གྱི་རི་ལ་སྒྲུབ་པ་གྱིས་ཤིག་གསུངས་ཏེ་མི་སྣང་པར་གྱུར། དེར་དེའི་སྒྲུབ་ཐབས་ཀྱང་མཛད་དོ། །དེ་ནས་སྒྲ་མི་སྙན་དུ་གཤེགས་པའི་ལམ་དུ་གྲོང་ཁྱེར་ས་ལ་ཨ་ན་ན་བྱིས་པ་ཅིག་འཇི་ཏ་ཀའི་ལག་བྲིས་ལས། རྒྱལ་པོར་ལུང་བསྟན་ཏེ་སྒྲ་མི་སྙན་དུ་བྱོན། ན་བཟའ་ཤིང་ལ་བཀལ་ནས་ཁྲུས་འཛད་པས། གོས་དེ་གཞན་གྱིས་ཁྱེར་བ་ལ། ངའི་ཡིན་བྱས་པས་ང་བདག་ཅན་ཟེར་ནས་གཏད་སྐད། དེར་སྒྲ་མི་སྙན་པའི་དོན་བྱས་ཏེ་བྱོན། དཔལ་གྱི་རི་ལ་གཤེགས་