[A:༣༣བ]གྲོངས་བར་དུ་ཕ་ཡང་མི་འཆི་བས་ཁྱོད་ཀྱིས་རྒྱལ་སྲིད་སྐྱོང་བ་མི་ཡོང་ཟེར་བས། བུ་མྱ་ངན་སྐྱེས་ཏེ་ངུས་པ་དང་། མ་ན་རེ། དེ་ཙམ་གྱི་མྱ་ངན་མི་དགོས་ཀྱིས། སློབ་དཔོན་བྱང་ཆུབ་སེམས་དཔའི་སྤྱོད་པ་རླབས་པོ་ཆེ་ལ་གནས་པས་དབུ་བསླངས་ན་སྟེར་བར་འགྱུར་ཞིང་། དེར་ཡབ་ཀྱང་འགུམ་པས་ཁྱོད་ཀྱིས་རྒྱལ་སྲིད་ཐོབ་པར་འགྱུར་རོ་ཞེས་ཟེར་བ་དང་། དེ་ནས་རྒྱལ་བུ་དེས་སློབ་དཔོན་གྱི་དྲུང་དུ་ཕྱིན་ནས་དབུ་བསླངས་པས་བྱིན། དེའི་ཚེ་རལ་གྲིས་མ་ཆོད་པར་རྩྭ་ཀུ་ཤས་བཅད་པས་ཁྲག་མ་བྱུང་བར་བདུད་རྩི་འོ་མའི་རྒྱུན་ལྟ་བུ་བྱུང་ཞིང་། དབུ་བཅད་པའི་མཚམས་ནས། ང་ནི་འདི་ནས་བདེ་བ་ཅན་དུ་འགྲོ། །ཕྱི་ནས་ལུས་འདི་ལ་ཡང་འཇུག་པར་འགྱུར། །ཞེས་པའི་ཚིག་བྱུང་ངོ་ཞེས་ཀྱང་གྲགས། དེ་ནས་རྒྱལ་བུ་དེས་དབུ་སླར་འབྱར་གྱིས་དོགས་ནས་དཔག་ཚད་ཙམ་གྱི་སར་དོར་རོ། །སློབ་དཔོན་བཅུད་ལེན་གྲུབ་པས་སྐུ་ལུས་དང་དབུ་གཉིས་རྡོར་གྱུར་ཏེ་གནས་སོ། །དེ་ལྟར་ཡང་ཟླ་བ་གྲགས་པས་ཚིག་གསལ་ལས། དབུ་ནི་དོན་དུ་གཉེར་བ་འོང་ལ་ཐུགས་རྗེས་དབུ་ནི་བཅད་དེ་སྩལ་མཛད་ནས། །བདེ་བ་ཅན་དུ་ཀླུ་སྒྲུབ་གཤེགས་པར་གྱུར་པ་དེས་མཛད་པའི། །ཞེས་གསུངས་པ་ཡིན་ནོ། །དེ་ལྟ་བུའི་སློབ་དཔོན་ཆེན་པོ་དེ་ནི་མདོ་རྒྱུད་དུ་མ་ནས་ལུང་བསྟན་ཏེ། འཇམ་དཔལ་རྩ་རྒྱུད་ལས། དེ་བཞིན་གཤེགས་པ་ང་འདས་ནས། །ལོ་ནི་བཞི་བརྒྱ་ལོན་པ་ན། །དགེ་སློང་ཀླུ་ཞེས་དེ་འབོད་འབྱུང་། །བསྟན་པ་ལ་ནི་དད་ཅིང་ཕན། །རབ་ཏུ་དགའ་བའི་ས་ཐོབ་པ། །ལོ་ནི་དྲུག་བརྒྱ་དག་ཏུ་འཚོ། །རིག་པ་རྨ་བྱ་ཆེན་པོ་ནི། །བདག་ཉིད་ཆེན་པོ་དེས་ཀྱང་འགྲུབ། །བསྟན་བཅོས་སྣ་ཚོགས་དོན་