[A:༣༩བ]གཅིག་བསྟན་པ་དང་། སློབ་དཔོན་གྱིས་དེ་ལ་ངོ་མཚར་ཆེ་རྒྱུ་མེད་ཅེས་གསུངས་ནས་ཞབས་ཀྱི་མཐིལ་ནས་ཀྱང་མིག་གཅིག་བསྟན་པས། དེ་ནས་ཁོ་ན་རེ། ཁྱོད་ཀྱིས་ངའི་རྩོད་ཟླ་མི་འོང་གི སྲིང་མོ་དང་། ནེ་ཙོ་དང་། ཐེ་ལེ་སྐོར་རྣམས་ཀྱི་ལན་ཐོབ་ཅིག་ཟེར་བ་ལ། སློབ་དཔོན་གྱིས་དགེ་བསྙེན་དང་བྱི་ལ་དང་མར་ནག་རྣམས་བཏང་བས། སྲིང་མོ་དེ་དགེ་བསྙེན་ངོ་ཚ་མེད་དེ་མཐོང་བ་ན་ངོ་ཚ་ནས་གང་ཡང་སྨྲ་མ་ནུས། ནེ་ཙོས་ཀྱང་བྱི་ལ་མཐོང་བ་ན་སྐྲག་ནས་གང་ཡང་མ་ནུས། ཐེ་ལེ་སྐོར་གྱི་ས་ལ་སྒྲ་ཚད་ཀྱི་ཡི་གེ་རང་བྲིས་སུ་ཡོང་བ་དེ་མར་ནག་ཕོ་བས་ཐམས་ཅད་ཉམས་པ་དང་ཁོ་སྤོབས་པ་ལན་མེད་པར་གྱུར་ཏོ། །དེ་ནས་རྒྱལ་པོ་དཔང་དུ་བཞག་ནས་བརྩད་པས། དང་པོར་ཀུན་གྱིས་གོ་ཡང་། ཇི་ཞིག་ན་གྲུབ་མཐའ་ཤིན་ཏུ་ཆ་ཕྲ་བར་གྱུར་ཏེ། རྗེས་སུ་བརྗོད་པའི་དཔང་པོས་རྗེས་གཅོད་མ་ནུས། ཤན་འབྱེད་པའི་དཔང་པོས་བཤད་མ་ཕྱེད། དེས་སྟོབས་ཀྱིས་རྒྱལ་པོས་ཀྱང་ཚར་བཅད་རྗེས་བཟུང་གང་ཡང་མ་ཤེས་པ་དང་། ཁོ་ན་རེ། བླུན་དཔྱད་ལ་དྲི་ཟེར་ནས་གླང་རྫི་བཀུག་ནས་དྲིས་པས། སློབ་དཔོན་རྒྱལ་ཟེར། ཡང་ཁོ་ན་རེ། རྫུ་འཕྲུལ་འགྲན་པས་ཁྱེད་རང་ནམ་མཁར་དཀྱིལ་འཁོར་བྲིས། ངས་བསུབ་བོ། །ཡང་ན་ངས་བྲི་ཡི། ཁྱེད་རང་བསུབ་ཟེར་བ་ལ། ཁོ་འདྲིར་བཅུག་སློབ་དཔོན་གྱིས་བསུབ་བོ། །ཡང་ཁོ་ན་རེ། ཡང་ན་ང་ནམ་མཁའ་ལ་འཕུར། ཡང་ན་ཁྱེད་རང་འཕུར་ཟེར་བ་ལ། སློབ་དཔོན་གྱིས་ཁྱེད་རང་འཕུར་གསུངས་པས། ཁོས་རྒྱང་རིང་པོར་འཕུར་བ་ན། སློབ་དཔོན་གྱིས་