[A:༣ན]ནས། །ཟས་གཙང་སྲས་བཞིན་དགེ་མཚན་བཅས་ཏེ་བལྟམས། །ཞེས་པ་ལྟར་ངོ་མཚར་བའི་ལྟས་དུ་མ་དང་བཅས་ལེགས་པར་འཁྲུངས་པ་ཡིན་ཏེ། དེ་ཡང་བདག་ཉིད་ཆེན་འདིའི་ཡུམ་རྩེ་གདོང་བླ་བྲང་དུ་མི་ཕེབས་ཙམ་གྱི་ནུབ་གཅིག་མན་ལམ་དུ། རི་གཅིག་ལ་འཛེག་གིན་འདུག་པ་ན་མུན་པ་ཆེས་ནས་ལམ་མི་རྙེད་སྙམ་པའི་ཚེ་རུམ་ནས་ཉི་ཟླ་གཉིས་འཐོན་ནས་ཕྱོགས་ཐམས་ཅད་གསལ་བར་བྱས་པ་རྨིས་ཤིང་། ཡུམ་གྱི་ལྷུམས་སུ་ཞུགས་པའི་ཚེ། རྩེ་གདོང་གི་བྱང་ཕྱོགས་ན་རྗེ་བཙུན་ས་སྐྱ་པའི་བླ་མཚོ་ཡིན་པའི་མཚོ་ཞིག་ཡོད་པ་དེ་ཆེར་རྒྱས་པ་དང་། གཤིན་རྗེ་གཤེད་ཀྱི་རྣལ་འབྱོར་པ་འབུམ་སྟོན་ཡེ་ཤེས་རྒྱལ་མཚན་གྱི་མནལ་ལམ་དུ། རྩེ་གདོང་བླ་བྲང་པའི་གསོལ་ཞིང་ཆེན་མོ་ལ་ཡབ་གུང་ན་བཞུགས་ནས་ས་བོན་འདེབས་ཅིང་། སྐྱེ་བོ་གཞན་དུ་མ་དང་བཅས་པས་ཕུན་སུམ་ཚོགས་པའི་བཀྲ་ཤིས་བྱེད་པ་དང་། རྨིས་ལྟས་པ་གཞན་འགའ་ཞིག་གིས་རྨི་ལམ་དུ་བླ་བྲང་ལ་ས་དཀར་གསོལ་བ་དང་། སྟེང་ན་དར་འཕྱར་བ་དང་། ཉི་ཟླ་ཤར་བ་ལ་སོགས་པ་བྱུང་ཞིང་། ཁྱད་པར་དུ་ཡུམ་ལ་རྨི་ལྟས་བཟང་པོ་དུ་མ་དང་། ཉིན་པར་གྱི་ཚེ་ཡང་ཤེས་པ་གསལ་ཞིང་བདེ་བས་བརྒྱན་པ་དང་། ལུས་ལྡང་པ་ཡངས་ཤིང་ཟོ་མདོག་བདེ་བ་ལ་སོགས་པའི་རྟགས་ཁྱད་པར་ཅན་དུ་མ་བྱུང་བར་གྲགས་ལ། དེ་ལྟར་ལྟས་དུ་མ་དང་བཅས་ཤིང་ཟླ་གྲངས་རྣམས་ཐིམ་པ་ན། ཤིང་མོ་སྦྲུལ་གྱི་ལོ་ཆུ་སྟོད་ཟླ་བའི་ཉེར་བརྒྱད་ཀྱི་ཉིན་བཀྲ་ཤིས་པའི་དགེ་མཚན་དུ་མ་དང་