[A:170]zhabs dang bcas pa chab 'og tu btsud/ dus gsum mkhyen pa mtsho skyes rdo rje'i ring lugs pa slob dpon bai ro tsa na'i thugs sprul gter ston shes rab 'od zer ti shrir bsten nas/ sa 'dzin dpal gyi ri la theg mchog sgrub pa'i 'dus sde btab/ sher phyin sum brgya pa/ shel brag gi thang yig sems nyid ngal gso rnams par du bzhengs/ 'brug nas sprul pa'i sku kun mkhyen ngag dbang nor bu sogs dam pa du ma la phu dud mdzad/ dkar phyogs rdzogs pa gnyis pa'i tshes la dpa' bo mkha' 'gro'i dga' ston spros bcas dang spros med kyi zlos gar le'u brgyad pa'i cho ga bsgrigs bzhin btsugs/ gdan sa chen po ri bo dga' ldan gyi shar pa chos rje nam mkha' rgyal mtshan zhes rig pa'i gnas lnga la ma rmongs pa'i mkhas pa de spyan drangs nas ri bo bde chen ser khyim pa lta bur song ba slar gtsang dgon mdzad/ 'bring pos rgyal ba'i bstan pa spyi dang / khyad par chos kyi rgyal po btsong kha pa chen po'i bstan pa la rmad du byung ba'i bkur sti dang phud dud mdzad/ chung ba gtsug lag rtsis kyi gzhung lugs la mkhyen pa'i spyan yangs so// mched rnams la jo mo 'od gsal lha'i gdung brgyud mi dbang byams pa rab brtan gyi sras mo don grub blangs par sras ngag gi dbang phyug mched gnyis dang lcam gsum 'khrungs/ dang po ni/ lhums su zhugs pa'i skabs mtshan ma khyad par can mang du byung zhing / lugs gnyis la mkhyen pa'i spyan yangs/ 'chi med grub pa'i ring lugs pa chos rgyal khri srong lde'u btsan gyi yon tan gyi sprul pa byang pa bdag chen ti shrir bsten/ khyad par gsang chen rdo rje theg pa la rtsal du thon pas rim gnyis kyi rnal 'byor zab mo la thugs dam gyi mthil du mdzad/ yi dam dang chos srung gi gnang ba thob pas lha srin bran du 'khol nus pa'i mthu stobs dbang phyug gi snyan pa che zhing /