[A:༡༧༠]ཞབས་དང་བཅས་པ་ཆབ་འོག་ཏུ་བཙུད། དུས་གསུམ་མཁྱེན་པ་མཚོ་སྐྱེས་རྡོ་རྗེའི་རིང་ལུགས་པ་སློབ་དཔོན་བཻ་རོ་ཙ་ནའི་ཐུགས་སྤྲུལ་གཏེར་སྟོན་ཤེས་རབ་འོད་ཟེར་ཏི་ཤྲིར་བསྟེན་ནས། ས་འཛིན་དཔལ་གྱི་རི་ལ་ཐེག་མཆོག་སྒྲུབ་པའི་འདུས་སྡེ་བཏབ། ཤེར་ཕྱིན་སུམ་བརྒྱ་པ། ཤེལ་བྲག་གི་ཐང་ཡིག་སེམས་ཉིད་ངལ་གསོ་རྣམས་པར་དུ་བཞེངས། འབྲུག་ནས་སྤྲུལ་པའི་སྐུ་ཀུན་མཁྱེན་ངག་དབང་ནོར་བུ་སོགས་དམ་པ་དུ་མ་ལ་ཕུ་དུད་མཛད། དཀར་ཕྱོགས་རྫོགས་པ་གཉིས་པའི་ཚེས་ལ་དཔའ་བོ་མཁའ་འགྲོའི་དགའ་སྟོན་སྤྲོས་བཅས་དང་སྤྲོས་མེད་ཀྱི་ཟློས་གར་ལེའུ་བརྒྱད་པའི་ཆོ་ག་བསྒྲིགས་བཞིན་བཙུགས། གདན་ས་ཆེན་པོ་རི་བོ་དགའ་ལྡན་གྱི་ཤར་པ་ཆོས་རྗེ་ནམ་མཁའ་རྒྱལ་མཚན་ཞེས་རིག་པའི་གནས་ལྔ་ལ་མ་རྨོངས་པའི་མཁས་པ་དེ་སྤྱན་དྲངས་ནས་རི་བོ་བདེ་ཆེན་སེར་ཁྱིམ་པ་ལྟ་བུར་སོང་བ་སླར་གཙང་དགོན་མཛད། འབྲིང་པོས་རྒྱལ་བའི་བསྟན་པ་སྤྱི་དང་། ཁྱད་པར་ཆོས་ཀྱི་རྒྱལ་པོ་བཙོང་ཁ་པ་ཆེན་པོའི་བསྟན་པ་ལ་རྨད་དུ་བྱུང་བའི་བཀུར་སྟི་དང་ཕུད་དུད་མཛད། ཆུང་བ་གཙུག་ལག་རྩིས་ཀྱི་གཞུང་ལུགས་ལ་མཁྱེན་པའི་སྤྱན་ཡངས་སོ༎ ་མཆེད་རྣམས་ལ་ཇོ་མོ་འོད་གསལ་ལྷའི་གདུང་བརྒྱུད་མི་དབང་བྱམས་པ་རབ་བརྟན་གྱི་སྲས་མོ་དོན་གྲུབ་བླངས་པར་སྲས་ངག་གི་དབང་ཕྱུག་མཆེད་གཉིས་དང་ལྕམ་གསུམ་འཁྲུངས། དང་པོ་ནི། ལྷུམས་སུ་ཞུགས་པའི་སྐབས་མཚན་མ་ཁྱད་པར་ཅན་མང་དུ་བྱུང་ཞིང་། ལུགས་གཉིས་ལ་མཁྱེན་པའི་སྤྱན་ཡངས། འཆི་མེད་གྲུབ་པའི་རིང་ལུགས་པ་ཆོས་རྒྱལ་ཁྲི་སྲོང་ལྡེའུ་བཙན་གྱི་ཡོན་ཏན་གྱི་སྤྲུལ་པ་བྱང་པ་བདག་ཆེན་ཏི་ཤྲིར་བསྟེན། ཁྱད་པར་གསང་ཆེན་རྡོ་རྗེ་ཐེག་པ་ལ་རྩལ་དུ་ཐོན་པས་རིམ་གཉིས་ཀྱི་རྣལ་འབྱོར་ཟབ་མོ་ལ་ཐུགས་དམ་གྱི་མཐིལ་དུ་མཛད། ཡི་དམ་དང་ཆོས་སྲུང་གི་གནང་བ་ཐོབ་པས་ལྷ་སྲིན་བྲན་དུ་འཁོལ་ནུས་པའི་མཐུ་སྟོབས་དབང་ཕྱུག་གི་སྙན་པ་ཆེ་ཞིང་།