[A:185]gnyal byar lor gsum/ lho brag dwags kong du rgyal bzang gi dpung zhib sgril byung ba bzlog thub pa sogs dgra thog tu mngon par lci ba'i dpa' grags kyis srin po'i rgyal po lang ka mgrin bcu la skyengs pa ster nus/ dga' ldan dngul gdung rin po cher sgo rgyan/ 'phrul snang gtsug lag khang gi gser thog bzo ba/ rin cen sgang du rig pa'i dbang phyug chos kyi grags pa'i ring lugs kyi bshad grwa 'dzugs pa sogs rnam dkar gyi mdzad pa'i zla snang gis legs byas puNDa ri ka'i tshal ches cher rgyas par mdzad cing / rigs rus yon tan du mas mngon par mtho ba'i lha'i btsun pa bsod nams dpal bzang dang / mkhas pa'i dbang po shar pa chos rje nam mkha' rgyal mtshan sogs ti shrir bsten nas bkur sti bla lhag tu mdzad/ thun mong dang thun mong ma yin pa'i rig pa'i gnas mtha' dag la rnam dpyod kyi rtsa la rmad du byung ba'i yon tan dundu bhi'i sgra dbyangs skabs gsum bdag po'i gnas su bsgrags so//
'di nyid kyi sras sde pa g.yul rgyal nor bu lugs gnyis kyis mngon par mtho zhing sras bsod nams rnam rgyal/ yid bzhin nor bu chos rje gsum las/ gcen gnyis kyis rtse nas gong ma'i lcam jo mor bsus pa'i sras mgon po rab brtan/ rdo rje rnam rgyal/ chos rje mtsho skyes rdo rje rnams byung ngo // smras pa/
sde bzhi'i dpal 'byor yongs 'du rlangs kyi ljon//
gnam bskos rgyal srid yal 'dab stug po las//
bsod nam dpung gis spyod pa'i mi bdag 'bras//
mnga' 'bangs dga' ba'i 'dod rgu char du phab//
rigs rus bzang po'i nor 'dzin dbus//