[A:186]stobs 'byor gser gyi 'dzin mas bskor//
ya rabs rnam thar lhun po'i rtser//
rgyal phran nye dbang tshogs kyi 'dus//
chos srid blang dor gnas kun la//
ma 'dres gzigs pa'i spyan stong ldan//
sde srid mchod sbyin brgya pa gang //
srid 'dir mtho ba'i khri la 'gying //
de ltar gong ma ta'i si tu nas bzung ste/ bod gnyan zhan gyi go rim sil bur ma gyur gyi bar/ srid kyis mngon par mtho ba phal cher ni sde srid gong ma'i thugs la btags shing / lung dang las ka gnang ba shas che na'ang / sa skyong lha rgya ri ba ni/ gong sa nas lung dang 'ja' sa ched du ma blangs par/ nyi 'og gi rgyal por gyur pa zhig ste/ de yang bod chos rgyal gyi gdung brgyud dri ma med pa gnam lde 'od srungs kyi sras mnga' bdag dpal 'khor btsan gyi brgyud tsha ba khri bkra shis brtsegs pa'i sras gsum gyi 'od lde las rim par byung ba/ 'od skyid 'bar gyi sras gtsang tsha spun drug las brgyud de/ gdan sa thel gyi mdar bcad po tsha ba rong pa zhes mi dpon zhig dpal phag mo gru pa rdo rje rgyal po'i dus byung zhing / de nas rim par brgyud nang so mda' smad pas/ e stod chu tshan kha zhabs su ri la rtswa rgya bo skyes pa zhig na gzhis ka brtsigs pas rgya ri zhes ming du chags/
de nas lha chos kyi bshes gnyen sogs zhal ngo rim par byung ba las/ lha dgra las rnam rgyal gyis ri rdzong du bzhugs/ thams can mkhyen pa dge