[A:368]rje rgyal ba na bza' brag phug pa zhes mtshan yongs su grags pa de nyid nges par rdo rje 'chang yin la/ rnam pa mi'i gzugs kyis 'gro ba rnams kyi 'dren pa mchog dam par byon pa'i rnam par thar pa zur tsam brjod na/
Teachings from Shang dKon mchog dpal
de yang sku gzhon nu'i dus nyid nas 'gro ba'i mgon po chos rgyal 'phags pa'i thugs kyi sras mchog rim pa gnyis la brtan pa thob cing bsams na shes pa'i mngon par shes pa la sogs pa yon tan bsam gyis mi khyab pa mnga' ba'i bla ma dam pa zhang dkon mchog dpal las rab tu byung ste/ zhabs drung du yun ring du bsten cing mnyes pa gsum gyis mnyes par mdzad/ de nyid las bcom ldan 'das kye rdo rje bdag med ma/ 'khor lo bde mchog /rdo rje 'jigs byed/ gshed dmar/ gsang 'dus/ sgrol ma/ ma hA mA ya/ rdo rje rnal 'byor ma/ ku ru kulle/ kun rig rtsa ba'i dkyil 'khor/ gtsug tor rnam rgyal/ rdo rje nag po chen po la sogs pa dpal ldan sa skya'i chos rgyud dri ma med pa rnams kyi dbang / byin rlabs/ rjes gnang / gsung ngag rin po che lam skor dang bcas pa la sogs pa'i gdams ngag /rgyud 'grel/ phyag len mtha' dag bum pa gang byo'i tshul du thugs su chud cing byin gyis brlabs nas/ skabs 'ga' zhig tu bdag la zhabs tog dgos pa'i stobs kyis bsgom long tsam mi 'ong bar gda' zhus pas/ dus phyis gzhan la phan par 'dug gis zhes pa dang / mnal lam du na bza'i phug grub thob 'dar phyar gyi dgon pa de yin no snyam pa cig na shing gi khri cig na gos gser ma'i khri gdan 'ga' re dang / phyi nang stan dmar po dang / ser po mang rab kyis bskor ba cig 'dug su'i yin byas pas/ slob dpon bsod nams dpal 'byor pa yin zer ba cig byung / khyod la der phan thogs 'dra 'ong bar 'dug /der yang thang re sdod cig ces lung bstan pa yang mdzad/ gdams ngag zhu ba'i tshe bde gsal mi rtog pa'i ting nge 'dzin dang mthong snang khyad par can la sogs pa yang gzigs so/ /