[A:372]shin tu dben par bzhugs pa'i tshe/ bcom ldan 'das 'khor lo bde mchog dang / kye rdo rje dang / ston pa'i gtso bo la sogs pa'i yi dam gyi lha mang po'i zhal gzigs/ bla ma brgyud pa rnams dngos su byon/ 'jig rten gyi dge legs dang / rje pa nyid kyi rnam par thar pa sems can gyi don du ji ltar 'gyur ba rnams zhus pa bzhin lung bstan pa thob/ de dus na dag pa'i zhing du mkha' 'gro ma rnams kyis spyan 'dren pa la/ da rung dge sbyong gi bre kha re tsam 'gengs pa la 'dir bsdad pa khyab che bar 'dug gsungs te/ phyi nang gi rten 'brel gyi gnad mkhyen pas so/ /yang skabs shig na/ gzims khang gi steng na sku 'chag pa'i tshe/ rje pa nyid kyi sku'i rim gro la bzhengs pa'i rnam rgyal mchod rten gyi bum pa'i nang du bcom ldan 'das rnam par rgyal ma sku las nyi ma'i dkyil 'khor lta bu'i 'od zer 'phro ba gzigs shing / sems can gyi don la bsnyel bar ma gyur tam zhes dbugs dbyung ba yang mdzad do/ /rdo rje theg pa'i bstan pa spyi dang dam tshig la gnas pa kun la nye bar dgongs nas bdud rtsi ril bu'i sgrub pa lan gnyis mdzad pa'i snga ma la yang dri zhim pos rgyang ring por khyab pa la sogs pa byung zhing / phyi ma bsgrub par bzhed pa na/ lo gcig tsam gyi gong du/ rje btsun sa skya pa chen pos 'di myur du sgrubs/ ma bsgrubs na bdud rtsi ril bu'i bka' chad par 'dug go zhes gsungs pas/ brtson pa cher mdzad de/ gser srang gsum tsam gyi sman dang / bla ma gong ma'i bdud rtsi'i ril bu'i rgyun bzang po dang bcas nas/ dge slong rdo rje 'dzin pa sum cu tsam gyis zhabs tog byas te bsgrubs pas/ mnal lam du dam tshig gi rdzas la mkha' 'gros bskor ba byed pa la sogs pa byung zhing / phyi rabs kyi sngags 'chang rnams la phan pa'i rgyun chen po yang mdzad/ rje btsun dam pa'i slob ma grub thob dar brtson skye bdun yin zer zhing / pur gyi sha phyag tu 'bul ba byung ba la