[A:413]pa'i zhal ta bzang po mdzad de/ yos lo zla ba lnga pa'i tshes bcu'i tho rangs kyi cha la rgyud sde nas gsungs pa'i 'da' ka ma'i thugs dam zab mo'i ngang nas zhi bar gshegs pa'i tshul bstan/ snga mo'i dus kyi gsung sgros la/ spyir bla ma thams cad la dbye ba med na yang / chos rje rin po che dang / ri khrod pa gnyis po nged kyi rtsa ba'i bla ma yin zhing khyad par chos rje rin po che de nyid nges par dga' ldan du gshegs pa yin/ de'i rten 'brel gyi nang rten la yang byams pa'i sku bzhengs gsungs pa mdzad/ 'di rnams yid brtan thub pas chos rje gang du bzhugs par skye ba'i 'dun pa dang smon lam yang byas gsungs pas/ gsung sgros 'di la bsams na bla ma 'di nyid kyang / 'od gsal las zung 'jug tu bzhengs dus dga' ldan du byon pa la the tshom med do/ /sku gdung mchod rten du bzhugs pa'i dus su yang / dri zhim po dang / sil snyan gyi sgra byung ba dang / gdung bzhu ba'i dus su 'ja' 'od la sogs pa ngo mtshar ba'i ltas du ma dang / gdung khang zhal phye ba na/ sku gdung ring bsrel la sogs pa bsam gyis mi khyab pa byon pas kyang gdul bya rnams kyi dad pa'i padmo shin tu rgyas par mdzad pa yin no/ /zhes pa 'di ni bla ma 'di nyid kyi rnam thar grub chen buddha shrIs mdzad pa'i nang nas mdor bsdus te/ gsung ngag bla ma brgyud pa'i rnam thar gyi kha skong du dkon mchog rgyal mtshan gyis bris pa'o//