[A:472] rje sa chen gyi yig thang cig dang / rgya'i rdo rje dril bu cig dang / bla gos cig gnang ste/ sku lus la shed med pa ma gtogs bsnyung zug la sogs pa ci yang med/ sku shed med pa'i stobs kyis rngam ba rgod bag can cig 'dug /gzhan rlung ltas dang mnal ltas log pa ci yang med gsungs/ de lta na yang / bde bar gshegs na 'di ltar gyis zhal ta thogs pa cig gnang gin 'dug /zhib tu sang nas khyoms po 'ong zhes gsung / bdag gis zhal ta'i lan gyi zhu ba la mdor bsdus shig phul/ zhib tu sang nas 'bul zhes zhus na'ang / zhing 'di'i bstan pa dang gdul bya rnams kyi bsod nams rdzogs pa dang / zhing khams gzhan du gdul bya shin tu rgya che ba la dgongs te/ sa ga zla ba'i nyer lnga'i nyi ma dros tsam na/ rgyud sde nas gsungs pa'i 'da' ka ma'i thugs dam zab mo la mnyam par bzhag ste/ bde bar gshegs pa'i tshul bstan no/ /der rjes gong gi zhal ta gzhir bzhag ste/ zong cha len pa dang / mchod spong len pa la sogs pa ma byed gsung pa yin zhes dril bsgrags/ phyag rdzas gang yod rnams kyi steng nas gsol 'debs la sogs pa'i thugs dgongs rdzogs pa'i thabs dang / gdan sa chen po dang / gsang phu dang na lendra la sogs par yang mang ja 'gyed dang bcas pa rnams thugs kyi dgongs pa bzhin legs par bsgrubs shing / nang rten ston pa'i gser sku chen mo dang / sku 'dra gser sku sku tshad ma dang / phyi rten bde gshegs mchod rten brgyad rnams bzhengs pa'i dbu btsugs te/ lo gcig na bar chad med par legs par mthar phyin pa dang / sku gdung me mo glang gi nag pa'i nyer bzhi'i bar du mchod pa'i dngos po bsam gyis mi khyab pa dang / bcom ldan 'das kye rdo rje'i sgrub mchod rgyun ma chad par phul nas/