[A:473] nyer bzhi'i snga skad sku gdung la zhugs 'bul ba'i tshe/ nam mkha' la 'ja' dang me tog gi char bsam gyis mi khyab pa bab cing / de man chad kyang me tog gi char rgyun mi chad par bab po/ /sa ga zla ba'i tshes gcig la gdung khang zhal phye ba'i tshe/ gdung rus la ring bsrel dkar po dang / ser po la sogs pa rab tu mang po byon 'dug pa rnams gos dar gyi na bza' bzang po dang dri bzang dang bcas te/ sku 'dra dang ston pa'i gser sku'i nang du bzhugs so/ /gdung rus lhag ma gdung thal dang bcas pa rnams zhal ta'i lugs bzhin cung zad tsam yang ma 'thor bar/ gdung tsha khri tsho bdun mi chad par bzhengs so/ /gdung tsha chung ngu'i zhabs la rdo rje rgya gram dang bcas pa khri tsho phyed bzhi tsam btab pa na bza' gser gsol te/ phyogs phyogs su byin rlabs kyi rten la yang 'bul ba'i lugs su byas/ gdung tsha lhag ma rnams gtsang khang gi nang du mchod rten gser 'bum cig bzhengs te/ de'i nang du bzhugs su gsol lo/ /de ltar gsol 'debs nas brtsams te/ gser 'bum gyi bar du bzhengs pa la/ bar chad kyi rnam pa cung zad kyang med par legs par mthar phyin pa 'di ni/ rje rin po che nyid kyi byin rlabs dang / thugs rje las yin par kun gyis mthun snang du grub bo zhes pa snyigs dus kyi rdo rje 'chang chen po chos kyi rje kun dga' bzang po'i rnam par thar pa rgya mtsho lta bu las chu thigs tsam cig blangs nas/ lam 'bras bla ma brgyud pa'i rnam thar gyi kha skong du/ rje nyid la mi phyed pa'i dad pa dang ldan pa'i bshes gnyen du mas bkas gnang ba'i ngor/ slob 'bangs kyi tha chungs dkon mchog rgyal mtshan gyis me mo glang gi lo gro bzhin gyi zla ba'i tshes bco lnga la dpal e waM chos ldan gyi gtsug lag khang du bris pa'o/ /
rje 'di'i rnam thar gu ge paN chen dang / ye chen pos mdzad pa rnam rnyed na slar 'dzud dgos// //