[A:32]ga la lang / da lta 'bras bu mchog gi go 'phang mngon du mdzad par gdon mi za bas dbang dang gdams pa tshul bzhin du thob pa rnams skal ba bzang bar shes par bya zhing / gzhan yang 'di nyid kyi sku mthong ba dang / mtshan thos pa thams cad srid pa dang ngan 'gro'i sdug bsngal rnam par spangs te rnam grol mchog 'thob par 'gyur bas don dang ldan pa kho na yin no// //de ltar mdzad pa rmad byung ngo mtshar phreng / /brjod pas bla ma'i rab mchog de nyid kyi/ bka' drin tshad med rab tu dran gyur pas/ /bdag ni spu ldang mchi ma g.yo bar gyur/ /gang zhig thos pas don dang rab ldan zhing / /mthong na dga' ba rnam par bskyed pa'i dpal/ /bsten na dge legs rin chen rtsol mdzad pa/ /khyod ni phan bde'i 'byung gnas rtsa lag mchog /mang thos yon tan dpal gyis rab dregs shing / /mkhas rlom bshes gnyen gang gzhan de dag gis/ /yon tan mthong bas 'dren mchog khyed nyid la/ /phyir zhing yid kyi gus pa lhag par 'phel/ /de slad 'gro ba'i mgon po khyed dran kyang / /gsung gi bdud rtsi nod pa'i skal bas dben/ /skyabs bral bdag la thugs rjes nyer bzung ste/ /zab don rtogs pa'i blo gros bskyed du gsol/ /gang gis khyed gsung 'chad dang sgom pa na/ /thugs rje'i mnga' bdag dpal ldan chos kyi rje/ /lhag par dran mod dbyings su gshegs gyur pas/ /bdag ni skal ba dman par gyur snyam sems/ /'on kyang khyed kyis gdams pa'i bdud rtsi las/ /rang sems rin chen yongs su dag pa 'di/ /lha dang bla mar snang zhen 'byung ba'i