[A:252]thos par dka' ba'i gtam snyan yid 'phrog lha yi rnga/ /thos pas snying mun cig car 'phrog cing bsams na bde chen dpal 'bar ba/ /deng 'dir bdag gis gsal bar bsgrags kyi skal bzang 'gro rnams tshur gshegs nyon/ /bde bar gshegs pa thams cad kyi ngo bo/ lha dang bcas pa'i 'jig rten pa thams cad kyi skyabs/ rigs pa dang grol bar smra ba'i spobs pa can mtha' dag gi spyi bo'i seng khri la zhabs kyi padma ngal gso ba'i mkhas pa chen po/ chos thams cad kyi gnas lugs yang dag pa'i don ji lta bar thugs su chud pa'i grub pa'i khyu mchog /rdo rje 'chang chen po'i gsung gi gsang ba rab 'byams la 'dod rgur spyod pa'i dam pa'i chos kyi 'khor lo bsgyur ba'i dbang phyug dam pa bdag cag gi dpal ldan bla ma dam pa rje btsun rdo rje 'chang sgo rum pa chen po kun dga' legs pa'i blo gros rgyal mtshan dpal bzang po'i zhal snga nas zhes mtshan gyi ba dan srid rtser sgreng ba 'di nyid ma lus shing lus pa med pa'i de bzhin gshegs pa thams cad kyi ye shes kyi sku'i ngo bo yin par gor ma chag la/ des na de nyid kyi mdzad pa ni/ dpal sangs rgyas thams cad dang mnyam par sbyor ba'i rgyud las/ rtag tu dri ma med pa thugs rjes shugs las byung / /smon lam grub pa 'gag pa med pa'i chos nyid can/ /'gro ba'i don sgrub rab rgyas brtson pa mtha' yas pa/ /thugs rje chen po'i bdag nyid rtag tu snang / /zhes gsungs pa ltar/ chos kyi sku spros pa thams cad dang bral ba las ma g.yos bzhin du sngon gyi smon lam dang dmigs pa med pa'i thugs rje chen