[A:6]mar me 'bar ba brgyad dang lhan cig gnas par mthong ste kun the tshom du gyur to/ /de ltar gyur kyang kun gyi mkhan po chen po yin pas gleng ba dang dbyung bar ma nus so/ /de'i tshe bstan pa la smod pa'i nyes pa spang ba'i don du bdag nyid ngan par khas blang bar bzhed nas/ rang gi brang khang nas 'thon nas chos gos dang lhung bzed la sogs pa dkon mchog gi spyan sngar mchod pa phul te gcer bu a me birWa zhes brjod cing ha der byon te/ me tog 'tshong ba rnams las bslangs nas phreng ba brgyus te mgo la btags/ lo ma dang / la phug 'tshong ba rnams las bslangs nas la la khar bcug /la la lag pas tshags byas so/ /de nas chang 'tshong ma dang smad 'tshong ma'i khyim du yang byon pas mi thams cad ha las par gyur nas/ rnga dang 'khar rnga brdungs te gnas nas phyung zhing slar 'ong du mi gzhug pa'i nang khrims bcas so/ /de'i tshe glu blangs pa ni gud du shes par bya'o/ /de nas sangs rgyas kyi bstan pa la phan par bya ba'i phyir dang / 'jig rten pa rnams mi mos pa bzlog par bya ba'i phyir dang / bdag nyid ngan par khas blangs nas ngan pa'i rtags gdon par bya ba'i phyir wA rA Na sIr 'gro ba'i lam ganggA'i drung du byon nas nga ngan pa yin na khyod kyis lam byin cig ces brjod pas chu bo mar song ba dang yar log pa'i mtshams su lam byung ngo / /de'i tshe glu blangs pas dge 'dun gyis grub pa thob par shes nas zhabs la 'ju ba la sogs pas bzod par gsol ba dang / bzhugs par zhu ba phul bas/ bzod par gnang zhing bzhugs par ma gnang nas/ wA rA Na sI'i nags gseb tu gos la sogs pa dang bral bar yun ring du bzhugs pas nyi lhags kyis khyer nas shin tu 'jigs par gyur nas/ la la mu stegs pa'i rnal 'byor pa yin zer/ la la sangs rgyas pa'i rnal 'byor pa yin zer ro/ /de'i tshe rgyal po na re/ 'di mu stegs pa yin na 'o brgyal bas nang du spyan drang dgos/