[A:༤༢༢]བརྡ་ཆོས་སུ་སྣང༌། དངོས་སུའང་བུད་མེད་རྒན་སོང་ལག་ན་འོ་མ་རྫ་ཕོར་ཕྱེད་ཙམ་དང་ལ་ཕུག་རྡོག་གཅིག་བཟུང་སྟེ་གཡོན་སྐོར་དུ་འོངས་པ་དང་ཞབས་སྐོར་གནང་བ་ཞལ་འཛོམས་པར་བུད་མེད་དེས་རྗེའི་ཞལ་ལ་ཅེར་གྱིས་བལྟ་ཞིང་འོ་མ་དང་ལ་ཕུག་ཕྱག་ཏུ་ཕུལ་ནས་སྒྲིམས་པ་གློད་ཟེར་བ་གསན་པས་ཐུགས་ཀྱི་ཉམས་རྟོགས་ལ་བོགས་ཤིན་ཏུ་ཆེ་བ་ཐོན། བུད་མེད་དེ་གར་སོང་ཆ་མེད་དུ་གྱུར་པ་ནི་རྣལ་འབྱོར་མ་རྒྱུད་ཀྱི་དམ་ཚིག་ལ་གཡོན་པའི་ཀུན་སྤྱོད་གཙོ་བོར་བཤད་ཅིང་གསང་སྔགས་སྒྲུབ་པའི་གནས་ལ་ལྷ་སའི་དུར་ཁྲོད་འདི་ཁྱད་དུ་འཕགས་ཚུལ་དཔལ་མར་མེ་མཛད་ཀྱི་གསུང་བཞིན་ལྷ་ས་སྨྱོན་མར་གྲགས་པས་བཀའ་ཆེམས་བཀའ་ཁོལ་མ་གཏེར་ནས་འདོན་པའི་ལུང་བསྟན་པ་དང་ཐམས་ཅད་མཁྱེན་པ་བསོད་ནམས་རྒྱ་མཚོས་སྨོན་ལམ་ཆེན་མོ་ཞིག་གི་དུས་སྔར་ཟ་མ་མྱོང་བའི་ཁ་ཟས་ཞམ་འབྲིང་པ་འགའ་ལ་གནང་ནས་མཁའ་འགྲོས་མགྲོན་དུ་བོས་གསུང་བ་སོགས་ཀྱིས་མཚོན་གནས་ཀྱི་ཁྱད་པར་ལས་ཡེ་ཤེས་མཁའ་འགྲོ་ཐ་མལ་གྱི་རྣམ་པར་རྒྱུན་མི་ཆད་པར་འབྱོན་པ་ཡིན་འདུག་པས་རྗེ་བཙུན་རྡོ་རྗེ་བཙུན་མོས་རྗེས་སུ་བཟུང་བའི་རྟགས་ཡིན་ནའང་མངོན་པར་མི་མཛད། བཀྲ་ཤིས་རྩེ་ནས་མཁན་རིན་པོ་ཆེས་ནཱ་ལནྡར་ཕྱག་དཔེ་གཡར་བར་དགེ་སློང་ཡེ་ཤེས་བློ་གྲོས་དང་བྱང་ཆུབ་གཉིས་གནང་བ། ང་གཉེན་སར་མགོན་པོད་འབོག་གི་རྟིང་ན་གྲིལ་བ་ཤབ་སྒྲ་དང་བཅས་དོན་ན་ཡང་ཇག་པ་གཉིད་དུ་སོང་ནས་མ་ཚོར་བར་ཡ་མཚན་ཆེ་ཟེར་སྐད། དེ་ནས་རྒྱལ་སྲས་ལྷ་རྗེའི་རྣམ་འཕྲུལ་འབྲི་གུང་ཞབས་དྲུང་ཆོས་རྒྱལ་ཕུན་ཚོགས་མཁར་རྩེར་བྱོན་པ་དང་འགྲིག །དེའང་འཇམ་དབྱངས་མཁྱེན་བརྩེའི་