[A:༤༦༢]རྫོང་མའི་བསྙེན་མཚམས་ཟླ་བ་བདུན་གྱི་བར་མཛད་པ་ཐེངས་ནས། རྗེ་རྡོ་རྗེ་འཆང་སྟོན་རྒྱབ་ལྕགས་སྟོད་དུ་དབང་བཞི་གྲོལ་ནས་ཞ་ལུར་ཕེབས་འཕྲལ་དོ་ནུབ་ཚོགས་འཁོར་གྱིས་གསུངས༌། ཞུགས་མེ་བཏང་ཚོགས་ལ་རོལ་སྐབས་འོ་མེ་དེས་ལྷབ་ལྷབ་བྱས་པ་དང་དྲན་བྱུང་མདང་ཐམས་ཅད་མཁྱེན་པ་ཕེབས་བྱུང་བ་དེ་རིང་ཁྱེད་འབྱོན་པ་ལ་ལྟ་བ་འདུག་གསུང་པ་རྗེ་མཁྱེན་བརྩེའི་རིང་ལུགས་སྤེལ་བ་ལ་རྣམ་པར་སྤྲུལ་པའི་དབུགས་དབྱུང་དུ་གདའ། ལྕགས་སྤྲེལ་ཡར་ཀླུངས་ནས་ཁྱབ་བདག་མགོན་པོ་བསོད་ནམས་མཆོག་ལྡན་རྡོ་རྗེ་འཆང་གི་སྐུ་གཞོགས་སུ་སྐོར་ཙམ་བྱོན་པའི་ཕེབས་ལམ་དུ་བཞུགས་སྐབས་རྡོ་རྗེ་འཆང་གི་མཚན་ལམ་དུ་རྨོ་མོ་ཚེ་དབང་གིས་དབོན་རིན་པོ་ཆེའི་ཡིན་ཟེར་བའི་ཞུ་ཡིག་དར་སྔོན་པོའི་རྟེན་དང་བཅས་པ་ཕུལ་ནས་ཁོང་འབྱོན་གྱིན་ཡོད་ཞུས་པ་དྲུང་དུ་འབྱོར་བར་ཁ་སང་རྨི་ལམ་ཞིག་བྱུང་བ་ཁྱེད་གློ་བུར་དུ་འབྱོན་པར་ལྟ་བས་ཡ་མཚན་གསུང༌། ནུབ་ཅིག་འོད་གསལ་དུ་པཎྜི་ཏའི་ཞུ་ཡིག་ཡིན་ཟེར་བ་ཕྱག་ཏུ་བྱུང་བ་ཅི་ཡིན་ནམ་དགོངས་པར་སང་ཉིན་མཁན་རིན་པོ་ཆེ་ངག་དབང་ཆོས་གྲགས་ཀྱི་ཞུ་ཡིག་འབྱོར་ཞིང༌། ནུབ་ཕྱི་མའི་མཚན་ལམ་དུ་མི་ཞིག་ན་རེ་མཁན་ངག་ཆོས་པ་འདི་ཁྲོ་ཕུ་ལོ་ཙཱ་བ་བྱམས་པའི་དཔལ་གྱི་སྐྱེ་བ་ཡིན་ཚུལ་བྱུང་བ་བླ་མ་དེ་ཉིད་ཤེས་བྱ་རིག་པའི་གནས་ལྔ་ལ་མཁས་པའི་རྣམ་དཔྱོད་ལ་དཔགས་ན་སྔོན་གྱི་ལོ་པཎ་ཞིག་གི་བག་ཆགས་ཀྱི་མཐུ་བརྟས་པར་གདོན་མི་ཟ་སྙམ། ཞབས་དྲུང་དབོན་རིན་པོ་ཆེ་སོགས་ལ་ཟླ་བ་གསུམ་གྱི་བར་མགོན་པོའི་གསང་འཁྲིད་སྨིན་རྒྱས་ཀྱིས་གཙོས་བཀའ་ཆོས་མང་དུ་སྩལ། ཞལ་གདམས་ཞིག་ཞུ་བ་གནང་བར། རང་ཉིད་མགོན་པོར་བྱེད་ན་གནས་ལུགས་སྒོམ། །མགོན་པོ་འབྲལ་