[A:༥༣༢]རྙིང་མའི་གཤེད་དམར་ལ་ཐུགས་དམ་བྱས་ན་ཚེ་ལ་ཕན་ཟེར་བ་བྱུང་སྟེ་ཞུུ་ས་མ་རྙེད། མྱུག་ཏུ་སླེབ་ནས་བཙལ་བས་ཉི་སྦུག་པ་ལ་བཞུགས་ཟེར། བྱ་ལོ་ཟླ་བ་ལྔ་པའི་ནང་དུ་ཉི་སྦུག་ལ་འགྲོ་ཁར། ཤངས་ཆུ་ཆེ་དྲགས་ཐར་ས་མི་འདུག་ཟེར་ནས་བཤེལ་བའི་ནུབ་རྨི་ལམ་དུ་ལུང་པ་ཁ་ལྷོ་བསྟན་རི་སྐྱ་ཧྲོབ་སེ་བ་ཞིག་གི་ལྡེབས་རབ་གསལ་ཉིས་བརྩེགས་ཡོད་པའི་ཁང་པ་ཞིག་ན་བླ་མ་འབེར་མོ་བྱིན་ཆགས་ཤིག་གི་དྲུང་ན་ང་འདུག་པ་ན་བླ་མ་དེའི་འཁྲིས་ན་ཨོ་ལོ་ནོར་བཟང་པ་ཡིན་སྙམ་པ་ཞིག་གི་ཕྱག་ན་རག་གི་འཕྲེང་བ་རྙིང་པ་ཞིག་བཟུང་ནས་འདི་ཨ་ཇོ་ལགས་རང་གི་ཐུགས་དམ་དང་ཐོག་མ་ནས་ཡིན་པས། ད་དུང་མཛད་ན་ཁེ་ཆེ་བ་འདུག་སྟེ་ཐེ་ཚོམ་ལས་མི་འདུག །དེང་སང་མ་བཟུང་ན་དེ་ནས་མི་ཡོང་ཟེར་བ་རྨིས་པ་ནས། སང་དེ་ག་ཆུ་ལ་མ་འཛེམས་པར་ཕྱིན་པས་ཁང་པ་སོགས་རྨི་ལམ་སོར་བཞག་གདའ། གཤེད་དམར་ནག་གི་དབང་ལུང་རགས་པ་ཐོབ། དབང་མ་ཐོབ་པ་ཞིག་གཤེད་དམར་གྱི་རྡུལ་ཚོན་གྱི་དྲུང་དུ་བཏང་བས་སྣ་ཁྲག་དར་འཕྱར་འཕྱར་བྱེད། ཤིན་ཏུ་གཉན་ལ་བྱིན་རླབས་ཆེ་བར་གོ་ལགས། དེ་རེས་ཞག་བཅུ་བསྡད། དབོན་པོ་དེས་ཆོས་གནང་བའི་སྤྱན་ཚབ་མི་ནུས་པར་གེགས་ཆེན་པོ་བྱས། རིན་པོ་ཆེའི་ཞལ་ཏ་ལ་མདང་ཞག་མནོས་པ་བཞིན་འབུལ་མི་ཐུབ་པ་འདུག་པས་ཕྱིར་བྱོན། ཁོང་ཚོ་མེ་ཏོག་ལ་སོང་ཤུལ་ལྟ་བུ་འགོལ་བ་ཞིག་ལ་ང་རང་གིས་གང་ཐོས་འདི་ཚང་མ་ཞིག་འབུལ་ཐུབ་ངེས་བྱེད་དོ་གསུངས། ཟླ་བ་བདུན་པའི་ནང་དུ་རྨི་ལམ་ལ་ལྷོ་སྟེང་གི་ཁང་ཐོག་ཡིན་སྙམ་པ་ཞིག་ན། རིན་པོ་ཆེའི་ཉི་སྦུག་པ་ཞལ་ནུབ་གཟིགས་བྱས་བཞུགས་པའི་དྲུང་ན་བདག་འདུག་པ་ལ། གཤེད་དམར་གྱི་སྐོར་པོ་ཏི་གཅིག་གི་ལུང་རྫོགས་