[A:༥༤༥]གཡོན་སྤྱང་ཀི་འགྱེད་པ་ཐོག་ཚད་ཙམ་ཞིག་ཕྱེར་མ་གྲོལ་བར་དངོས་སུ་མཐོང༌། དེ་སྐབས་གཟའ་བདུད་ཆེན་པོ་བབས་སྔར་ཡོང་བ་དེ་ག་སོར་བཞག་ལ་མིག་ཐམས་ཅད་ཨོང་ཀོང་བཏང་བ་ཙམ་དམར་ཧུར་རེ་བ། ཁ་དགུ་ཅར་མི་རེ་ཁུར་ནས་ཁྱུ་རུ་རུ་ཟ་བ་ཞིག་ལན་ཁ་རེ་མཐོང༌། འདི་ཡན་རྗེ་ཉིད་རང་གི་ཕྱག་བྲིས་དངོས་ལས་བཤུས་པ་ཡིན་ཅིང༌། དེ་མན་ཁ་བསྐང་བ་ཡིན། ཡང་སྐབས་ཤིག་བྱང་ཕྱོགས་ནས་རྦོད་གཏོང་གི་ལྟས་ཤིག་གིས་མནལ་ལམ་དུ་མི་མང་པོས་ཕྱག་ཞབས་ནས་བཏེག་ནས་མཚོ་ཆེན་པོ་ཞིག་ལ་བསྐྱུར་གྲབས་བྱས་པ་ན། རྗེ་ཉིད་ཀྱི་ཞབས་གཉིས་ཀྱི་བར་དུ་མཚོ་བཅུག་ནས་ཏིང་ངེ་འཛིན་ལ་བཞུགས་པའི་ཚེ། དཔལ་མགོན་ཆེན་པོ་ཞལ་བཞི་ཡོངས་རྫོགས་གཟིགས་ནས་རྦོད་གཏོང་ཀྱང་རང་ས་ལ་ཞི། ཡང་སྐབས་ཤིག་ཐུགས་ཉམས་ལ་མྱུག་ཡིན་དགོངས་པའི་ལུང་པ་འཕྲ་ཤུར་བ་ཞིག་ན་མར་ཁྲག་གི་ཆུ་རྒྱུན་ཆེན་པོ་འབབ་པ་ནམ་མཁའ་ནས་དམག་ཟོར་རེ་མ་ཏཱི་ཞེས་པའི་སྒྲ་བྱུང་བ་ལ་བརྟེན། ཁྲག་གི་རྦ་ཀློང་འཚུབ་པའི་ཁྲོད་ནས་ཁྲོ་མོ་ཁྲག་གི་རལ་པ་ཅན་འཇིགས་སུ་རུང་བ་སྐུ་རྐེད་ཡན་འཐོན་པ་ཞིག་གཟིགས་གསུང༌། སྟག་ལོ་ཚར་ཆེན་ཆོས་ཀྱི་རྒྱལ་པོ་སྐུ་མྱ་ངན་ལས་འདས་པའི་ཚུལ་བསྟན་ཚེ། རྗེ་ཉིད་ཀྱི་གཟིགས་སྣང་དུ་མདུན་གྱི་ནམ་མཁའ་ལ་དབུས་སུ་རྡོ་རྗེ་འཆང་བློ་གསལ་རྒྱ་མཚོ། གཡས་སུ་སྤྲུལ་སྐུ་ཤཱཀྱ་ཐུབ་པ། གཡོན་དུ་ཨྱོན་ཆོས་ཀྱི་རྒྱལ་པོ་རྣམས་དངོས་སུ་གཟིགས་གསུང༌། ཡོས་ལོ་ཞ་ལུར་མ་ཧེ་མཆོད་པ་ལ་ཕེབས་སྐབས། ལས་ཀྱི་གཤིན་རྗེ་ཡབ་ཡུམ་གྱི་ཞལ་འབག་ལ་བཀའ་བསྒོ་གནང་བའི་ཚེ་ལས་ཀྱི་གཤིན་