[A:582]pa sta gon/ gsum pa sgrub mchod dngos rnams la dgos pa'i gar thig dbyangs gsum sogs phyag len che phra mtha' dag sku ngos kyi phyag khrid du mdzad/ dkyil 'khor so so'i dbang lung / rnam rgyal ma'i rjes gnang rnams nas dbang cha grangs su bcad par shin tu 'grus shing dngos gtsang ba'i sgo nas rgyas par bstar/ me yos hor zla dang po'i cho 'phrul mchod pa'i dus chog gra rnams btsugs te 'dzugs ston dang bsnyen bkur sogs lha mchod mi mchod lhag par rgya che bar spel/ lo phyi ma rnams su rgyun mi nyams par bya ba'i slad du sgrub mchod thebs kyi mthun rkyen sbyar bas mtshon gsang chen rdo rje theg pa'i bstan pa rin po che srid mtha'i bar du nyams pa med pa'i thabs tshul 'di ni/ rgyal ba gnyis pa bu ston rin po che/ byams pa'i rnam sprul bdag po kun bzang 'phags/ kun mkhyen rdo rje gdan pa dang gsum gyis mdzad pa'i rjes su 'jug pa'i ngo mtshar gyi gnas che ba zhig tu snang / 'phags pa gang pos zhus pa'i mdo las/ byang chub sems dpas ma thos chos/ /thos na don du tshul bsam bya'i/ /bdag gis sngon chad ma thos zhes/ /de skad du ni smra mi bya/ /ma thos chos ni thos gyur na/ /yang dag dran pas sems byed na/ /rgya mtshor 'bab chu shong ba bzhin/ /de phyir shes rab 'phel bar 'gyur/ /zhes dam pa rnams ni thos pas nam yang mi ngoms pas sngon chad gsan bsam rgya cher mdzad na'ang de tsam gyi kho bos mang du thos so snyam pa'i mngon pa'i nga rgyal gyi chog shes shing 'dod yon la skom