[A:༧༣]སྐུ་གདུང་རིན་པོ་ཆེ་འཇམ་དཔལ་དབྱངས་དམར་པོ་ལྷ་ལྔའི་དཀྱིལ་འཁོར་གྱི་གཙོ་བོར་བཞེངས་པ་ལ་སྲེག་རྫས་ཀུན་ཏུ་བཟང་པོའི་མཆོད་པའི་སྤྲིན་ཕུང་རྒྱ་ཆེར་སྤྲོ་བར་མཛད་པའི་ཚེ་ཞུགས་རྩོལ་བ་ལ་མ་ལྟོས་པར་རང་འབར་ལྟ་བུ་དང་དེའི་སང་ཉིན་མེ་ཏོག་གི་ཆར་འདྲ་བ་ཉི་མའི་འོག་ནས་འོད་སྐྱ་སིམ་སིམ་གདུང་ཁང་ལ་ཉེ་བར་མང་དུ་བབས་པའི་ངོ་མཚར་ཅན་བྱུང༌། ཐུགས་བྲེལ་ཆོད་ནས་རྗེ་བླ་མ་པོ་ཏ་ལར་ཕེབས། སའི་སྙིང་པོ་འཁོར་ལོ་བཅུ་པའི་མདོ་ལས་བཤད་པ་བཞིན་ངེད་རང་ཡང་འཇིག་རྟེན་ཁུར་ལེན་དང་ཁྱད་པར་བདེ་གཟར་གྱི་གཡེང་བས་བདག་ཆེན་སྔགས་འཆང་ཆེན་པོ་དང་འབྲུག་པ་པདྨ་དཀར་པོ་གཉིས་ལ་འགྲན་བཟོད་པའི་བན་ལིང་གིས་བློ་ཁ་རྫོགས་པའི་ཞིབ་ཆ་ཞུུ་མ་ཐུབ་རུང་ད་ལྟའི་བཞུགས་གནས་གྲང་ཁང་ཆོས་འཁོར་ཤར་ཆེན་དང་ཁང་རྙིང་པའི་མཆོད་གཞིས་བཀྲ་ཤིས་ལྷུན་པོའི་གཟིམས་དཔོན་སོག་པོ་བློ་བཟང་ཆོས་འཕེལ་གྱིས་ཕྲོགས་པ་ལྕགས་ཡོས་ས་སྐྱོང་བསོད་ནམས་རབ་བརྟན་གྱི་དགོངས་ཁྲེལ་ལ་བརྟེན་ཚང་མ་ཤོར་བའི་གཞུང་ཁོངས་སུ་ཡོད་པ་དགོངས་བཞེད་ལྟར་ཕྱིར་འབུལ་ཞུས་པ་ཁྱབ་བདག་བཀའ་འགྱུར་བ་ཆེན་པོའི་དགོངས་རྫོགས་ལ་དམིགས་ནས་གསང་འདུས་སྒྲུབ་མཆོད་ཉིན་བཞི་སྤར་བ་གནང༌། ལྕགས་ཁྱིའི་སྟོན་ས་སྐྱོང་འཕྲིན་ལས་རྒྱ་མཚོའི་ཁྲི་འབུལ་ལ་ཕེབས། དེ་སྐབས་རྗེ་འདི་ཉིད་དང་ལྷན་དུ་ངོར་མཁན་ཆེན་དཔལ་གླིང་པ་གྲ་ཐང་མཁན་པོ་སངས་རྒྱས་དཔལ་བཟང་སོགས་ཁ་ཤས་ལ་ཆག་ལུགས་ཚེ་དཔག་མེད་ཀྱི་རྗེས་གནང༌། གྲུབ་རྒྱལ་དང་རྟ་མགྲིན་གསང་སྒྲུབ་ཀྱི་བྱིན་རླབས། ཐིག་ལེ་བཅུ་དྲུག་གི་དབང༌། བཀའ་གདམས་