[A:༣༥༦]དེ་ཞིག་སོང་བ་རྨིས་པ་དང༌། ཕྱིས་ཞིག་རྐྱེན་ཆེ་བ་ཞིག་གི་སྐབས། ངེད་རང་གི་སློབ་མ་ཞིག་གིས་རྗེ་ས་ཆེན་གྱི་སྐུ་ངོ་མཚར་རྨད་དུ་བྱུང་བ་གཟི་འོད་འབར་བ་ཞིག་གི་དབུ་ལྷུང་འདུག་པ་རྨིས་ཟེར་བ་དང༌། གུར་གྱི་མགོན་པོ་འདིས་དུས་དང་གནས་སྐབས་ཐམས་ཅད་དུ་བུ་གཅིག་པ་བཞིན་སྐྱོང་བར་མཛད་ཚུལ་འདི་དག་ལ་དཔགས་ན། སྐྱེ་བ་སྔ་མ་ཡང་ས་སྐྱ་པའི་བསྟན་པ་ལ་བྱ་བ་ཁྱད་པར་ཅན་བྱས་པའི་གང་ཟག་ཅིག་ཡིན་ནམ་སྙམ་པ་དང༌། ཚེ་འདིར་ས་སྐྱ་པའི་བསྟན་པ་ལ་ཕན་ཐོགས་མཁན་ཞིག་ཡིན་དགོས་རྒྱུར་འདྲ་ཡང༌། རང་རྒྱུད་ཀྱི་ཉོན་མོངས་དུག་ལྔ་ཤིན་ཏུ་རགས་པ་དང༌། ཐོས་བསམ་སྒོམ་གསུམ་ལ་ཡར་སྐྱེད་ཅུང་ཟད་ཀྱང་མེད་པ་དང༌། ལུང་རྟོགས་ཀྱི་ཡོན་ཏན་གྱིས་ཤིན་ཏུ་དབུལ་བ་སོགས་གང་ནས་བསམས་ཀྱང་གཏད་སོ་གང་ཡང་མེད་པས་སྒྱུ་མ་ཉིང་འཁྲུལ་རང་དུ་འདུག །ཡང་བཅད་རྒྱ་རུ་འདུག་སྐབས། ཀོང་སྤྲུལ་རྡོ་རྗེ་འཆང་གི་གཏེར་བྱོན་ཀུན་ཏུ་བཟང་པོའི་སྨོན་ལམ་འགྲུབ་པའི་རིལ་བུ་རེ་ཟོས་ནས་ཡིད་ལ་རེ་བའི་སྨོན་ལམ་མང་པོ་བཏབ་པ་དེ་འདྲ་བ་ཉིན་དུ་མ་བྱས་པས། སྐབས་ཤིག་རྨི་ལམ་དུ། རྗེ་བླ་མ་སཱུརྻའི་མཚན་ཅན་གྱི་དྲུང་དུ་སླེབས་འདུག་པ་ལ། རྗེ་དེ་ཉིད་ཀྱིས་འཇམ་དབྱངས་ཀྱི་སྐུ་གཟི་འོད་འབར་བ་ཞིག་དང༌། སྣག་ཚ་ཞིག་གཏད་བྱུང་བས། ད་དུང་བདག་ལ་བྱིན་རྟེན་ཞིག་གནང་དགོས་ཞུས་པ་ན། རྗེ་བླ་མ་ངག་དབང་བཤད་སྒྲུབ་རྒྱ་མཚོའི་ཐུགས་ལྗགས་སྤྱན་གསུམ་གྱི་ནང་ནས་སྤྱན་དེ་ཁྱེད་ལ་དབང་བ་ཡིན་གསུངས་ནས་ལག་ཏུ་སྤྱན་ཞིག་གཏད་བྱུང༌། འོ་ན་ད་དུང་རྗེ་བླ་མའི་ཕྱག་ཕྲེང་ཞིག་གནང་དགོས་ཞུས་པས། རྗེ་བླ་མ་དེ་ཉིད་ཀྱི་ཕྱག་ཕྲེང་གི་བརྒྱ་དཔོན་ཞིག་