[A:༣༧༨]པ་ལྟ་བུ་རྣམས། སྐུ་ཚེ་མཐར་ཕྱིན་པའི་ཚད་དུ་བྱས་ཀྱང༌། དེ་དག་ལས་ཀྱང་ང་རང་ལོ་གྲངས་མང༌། ད་ང་གཅིག་པུ་འདུག་རྒྱུ་ག་ལ་ཡོད། ཅེས་ཡང་ཡང་གསུངས་ཤིང༌། སྐུ་རིམ་སྒྲུབ་དགོས་ཞེས་ཞུས་པའི་ཚེ་དང་པོར་སློབ་མས་བླ་མའི་སྐུ་རིམ་བསྒྲུབས་ན་ཚོགས་ཆེན་པོ་རྫོགས་ཚུལ་གསུངས་ནས་ཐུགས་དགྱེས་ཚུལ་མཛད། དེ་ནས་ཉིན་གཉིས་གསུམ་ཐལ་བའི་མཚམས་སུ་ད་ཚོགས་པ་ཐམས་ཅད་ཀྱིས་རབ་འབྱམས་གཞུང་ལུགས་ཀྱི་མཐར། བདག་ཀྱང་ནམ་ཞིག་འཆི་བའི་དུས་ཀྱི་ཚེ། །འཇམ་མགོན་བླ་མ་གཞུང་ལུགས་རབ་འབྱམས་པས། །བདེ་བ་ཅན་གྱི་ཞིང་དེར་དྲངས་ནས་ཀྱང༌། །འོད་དཔག་མེད་པའི་ཞལ་མཆོག་མཐོང་བར་མཛོད། །ཅེས་པ་འདི་ཐོགས་ལ་དེ་ཁོ་ནར་གྲངས་གསོགས་ཤིག་ཅེས་གསུངས། སྒ་སྟོད་བསམ་གྲུབ་དགོན་པ་ཉིད་ཀྱི་སློབ་མ་ཞིག་གིས་ཚེ་ལྷ་རྣམ་གསུམ་གྱི་བྲིས་སྐུ་ཞིག་ཕུལ་ནས། ཁོང་ཚོས་དགོན་པས་ངོར་ཆེན་རྡོ་རྗེ་འཆང་གི་སྐུ་ཆེན་པོ་ཞིག་བཞེངས་ཡོད་པས། དེ་ཉིད་ཀྱི་དུས་ཆེན་ཧོར་ཟླ་བཞི་པའི་ཚེས་ཉེར་ལྔ་ལ་རབ་གནས་ཤིག་མཛད་རོག་ཞུས་པས། ཧ་ཧ་ང་དེ་དུས་འཇིག་རྟེན་ཕ་རོལ་ཏུ་འགྲོ་ཚར་གསུངས་པ་དང༌། ཕྱོགས་ཐ་དད་ནས་སློབ་མ་མཇལ་དུ་ཕྱིན་པ་རྣམས་ལ་ཡང་མི་རྟག་པ་དང༌། དགེ་བ་ལ་བསྐུལ་བའི་གསུང་འཕྲོས་ཁོ་ན་གནང་ཞིང་མཇལ་དར་ཕུལ་བ་རྣམས་ཀྱང་རང་རང་ལ་བསྐོན་ནས། དཔོན་སློབ་མི་འབྲལ་ལྷན་ཅིག་འགྲོགས། །ཞེས་སོགས་ཀྱི་ཚིགས་སུ་བཅད་པ་རེས་སྨོན་ལམ་གནང་ཞིང༌། ཁྱད་པར་དུ་སྐུ་གཤེགས་ལ་ཉེ་བའི་གོང་ཙམ། མཇལ་མི་བྱུང་ཚད་སྐུ་མདུན་དུ་ཐོང་ཤོག་གསུངས་ནས་སྨོན་ལམ་རེ་གནང་