'bul ba char ltar babs pa rnams kyang rang don du spyad pa dang bar ma dor chud mi za bar chos phyogs su btang bar mdzad pa'ang / ngor thar rtse mkhan rin po ches e waM chos ldan gyi gtsug lag khang gsar pa bsam grub mthong grol chen mo bzhengs pa'i nang / skyabs mchog rdo rje 'chang chen po 'di nyid kyis rten gyi gtso bor ston pa thub pa'i dbang po'i sku brnyan rgyu rin po che gser dngul zangs sogs las bskrun pa'i thog tshad ma/ de mtshungs bzhugs khri rgyab yol bzang gos kyi na bza' dang / 'khor byang chub sems dpa' byams pa dang / 'jam pa'i dbyangs gnyis bzhengs stabs su yod pa'i rten ngo mtshar can/ de'i mdun gser dngul kho na las grub pa'i mchod phreng tshar du dngar ba du ma bzhengs par mdzad/ yang rtsed gdong du lam 'bras gnang ba'i skabs shig ngos la gshin gson gyi 'brel thogs ji snyed par ci zhig mdzad na phan thabs che snyam du thugs la dgongs pa'i nub mo mnal dang 'od gsal 'dres pa'i ngang la bud med dmar mo zhig gis 'di srid pa'i rgyal mtsho yin zer ba'i khrag gi rgya mtsho shin tu rgya che ba'i dbus na gser gyi rdo rje rtse lnga pa chen po las 'od zer mtha' yas pa rab tu 'phro ba zhig gzigs pas/ de dag gi ched du mi 'khrugs pa'i sku zhig bzhengs nas phan che ba'i brdar dgongs te/ khang gsar bla brang du lha khang gsar bzhengs dang / de'i nang mi 'khrug pa'i sku thog tshad gnyis pa khri rgyab yol rgyan drug dang bcas pa/ de'i g.yas g.yon du sku mi tshad tsam gyi tshe dpag med/ sgrol ma/ birWa pa/ pad sdong las 'khrungs tshul gyi gu ru snang srid zil gnon yab yum bcas pa/ de dag la'ang khri rgyab yol sogs mdor na bla ma yi dam gyi sku brnyan rnams gser zangs las grub pa rin po che'i phra rgyan sna tshogs kyis spud pa/ de dag kyang sla bcos su ma song bar cha tshad dang bzo bkod phun sum tshogs pa/ gzungs zhugs bsam gyi mi khyab pa dang / rab tu gnas pa sogs byin rlabs gzi 'od 'bar ba'i mchod sdong chen po bzhengs par mdzad/ gsung rten lam 'bras/ rgyud sde kun btus/ sgrub thabs kun btus/ sa skya bka' 'bum/ rnams kyis mtshon glegs bam brgya phrag mang po bzhengs par dpe dril na bza' yang da phrul dmar ser gnyis re gdong dar gsol ba sogs phyag dper ha cang thugs gtsig che bar mdzad/ gzhan yang rgyud sde khag gi dkyil 'khor ras bris las grub pa ngo grangs brgya dang dgu bcu go bzhi dang / dbang rdzas tsakli brgya phrag lhag pa bcas/ de dag kyang rgyud sde so so'i mngon rtogs dang bstun lha grangs/ sku'i rnam 'gyur/ sku mdog /phyag mtshan sogs zhib dpyad lan mang mdzad de tshad dang mtshan nyid yongs su rdzogs par gsar bzhengs mdzad pa sogs rgyud sde thams cadakyi gsal byed dam par gyur/ rgyun du'ang nyin rer mchod me brgya rtsa re/ sgrol bstod phyag 'tshal nyer gcig tshar nyer lnga re chag med/ skabs su lha sa sogs su mchod me 'bum phrag 'bul bar mdzad pa sogs bsod nams mchod sbyin gyi mdzad phyogs kho na'ang ngo mtshar blo yul las 'das so/ /de lta bu'i skyes bu dam pa 'di ni dgung grangs bdun cu don bdun par bzhugs nas bstan 'gro'i don mtha' klas par mdzad mthar/ sku tshe mtha' ma'i mdzad pa bstan tshul ni/ gong du gsal ba ltar khang gsal