[A:༨] འཁོན་ཀླུའི་དབང་པོ་སྲུང་བ། རྨ་རིན་ཆེན་མཆོག །ཡེ་ཤེས་སྡེ། དྲན་པ་ནམ་མཁའ། གཙང་དེ་བྱིན་རྣམས་ཀྱིས་ལོ་ཙཱ་བྱས་ཏེ་ཆོས་སྔར་མ་བསྒྱུར་བ་མང་པོ་བསྒྱུར། བསྒྱུར་བ་རྣམས་སྐད་གསར་བཅད་ཀྱིས་བཅོས་ཤིང་གཏན་ལ་ཕབ། ཆོས་གྲྭ་དང་སྒོམ་གྲྭ་མང་པོ་བཙུགས། བོད་འབངས་རྣམས་བདེ་བ་ལ་བཀོད་དེ་དམ་པའི་ཆོས་རྒྱས་པར་བྱས་སོ། །དེ་ལ་སྲས་གཙང་མ། དར་མ། རལ་པ་ཅན་བྱ་བ་གསུམ་བྱུང་བའི་གཙང་མ་རབ་ཏུ་བྱུང༌། དར་མ་རང་རྒྱུད་ངན་པས་སེམས་ཅན་ལ་གནོད་ཀྱིས་དོགས་ནས་རྒྱལ་སྲིད་མ་གཏད་པར། ཁྲི་ལྡེ་གཙུག་བརྟན་རལ་པ་ཅན་དུ་གྲགས་པ་དེ་ལོ་བཅུ་གཉིས་ལ་ཡབ་འདས་ནས་དེ་ལ་རྒྱལ་སྲིད་གཏད། དེའི་རིང་ལ་འུ་ཤང་རྡོའི་གཙུག་ལག་ཁང་བཞེངས། མཁན་པོ་པྲཛྙཱ་ཝརྨ་དང༌། ཛི་ན་མི་ཏྲ་དང༌། སུ་རེནྡྲ་བོ་དྷི་ལ་སོགས་པ་མང་པོ་དང༌། ལོ་ཙཱ་བ་སྐ་བ་དཔལ་བརྩེགས་ཅོག་རོ་ཀླུའི་རྒྱལ་མཚན། ཞང་སྣ་ནམ་ཡེ་ཤེས་སྡེ་རྣམས་ཀྱིས་ཆོས་མང་པོ་བསྒྱུར་ཞིང་ཞུས་ཏེ་གཏན་ལ་ཕབ་ནས། དམ་པའི་ཆོས་ཤིན་ཏུ་དར་ཞིང་རྒྱས་པར་བྱས་སོ། །
གཉིས་པ་བར་དུ་འགྲིབས་པའི་ཚུལ་ནི། རལ་པ་ཅན་གྲོང་པའི་རྗེས་སུ་དར་མས་རྒྱལ་སྲིད་བཟུང་སྟེ། ཐོག་མར་རྒྱལ་སྲིད་ཆོས་བཞིན་དུ་བསྐྱངས་པ་ལས། བར་སྐབས་སུ་ཁོང་གི་ཐུགས་སུ་གདོན་གསོལ་ནས་ཇོ་བོ་ཤཱཀྱ་བྱེ་ཐེམ་དུ་སྦས། སྔགས་ཀྱི་རྒྱུད་སྡེ་རྣམས་རྒྱ་གར་དུ་བསྐྱལ། པུ་སྟི་མཆོད་ཆ་རྣམས་མུན་ཁུང་དུ་སྦས། པཎྜི་ཏ་རྣམས་རྒྱ་གར་དུ་ལོག །རབ་ཏུ་བྱུང་བ་ལ་ལ་བཀྲོང༌། ལ་ལ་རྟ་ཞོན་པའི་སྟེགས་བྱས། ལ་ལ་ཕབ་ནས་རྔ་གཤང་བསྐུར་ཏེ་བྱ་དང༌། རི་དྭགས་རྔོན་པ་ལ་བཀོལ་ནས་དབུས་གཙང་གི་བསྟན་པ་ཉམས་ཤིང་མིང་ཙམ་ཡང་མེད་པར་བྱས། དེའི་དུས་ན་འདུལ་བ་ལ་ལག་ལེན་ནི་ངལ་ཞིང་དུབ་པའི་མཐར་ལྷུང་བ་ཙམ་