[A:15]mang du gsan/ sgra'ang bslabs pas saM skr-i ta'i skad du chos gsan thub pa zhig mkhyen skad/ de nas bdag cag rgya gar du 'gro bas/ rgya gar na mkhas pa ji lta bu bdog /ji ltar byas na legs zhus pas/ bla ma'i zhal nas/ spyir rgya gar na o danta pu ri/ nA lendra/ sau ma pu ri'i gtsug lag khang la sogs pa mang du yod kyang / bi kA ma la shI la'i gtsug lag khang na da lta bstan pa dar bar yod cing / khyad par du de na mkhas pa sgo drug bya ba yod de/ shar phyogs kyi sgo srung ba ratna a kA ra shanti pa bya ba bzhugs pa la sgra dang tshad ma gtso bor 'dri/ de bzhin du lho phyogs kyi sgo srung ba ngag gi dbang phyug grags pa zhes pa rje btsun ma sgrol ma las chos dngos su gsan/ slob dpon chen po de la khyad par du sgra tshad snyan ngag lugs chos la sogs pa 'dri ba 'ong / nub phyogs na shes rab 'byung gnas blo gros la khyad par du mu stegs kyi grub mtha' la 'dri ba mang / byang phyogs na jo bo nA ro ta pa la theg pa chen po gsang sngags 'dri ba dang lung nod pa'ang mang du yod gsungs/ dbus kyi ka chen gnyis ni rin chen rdo rje dang / dznyA na shrI mi tra ste kha che dznyA na shrI ni min gsung / de gnyis la ka chen zer yang gzhan las yon tan che rgyu med de/ de rnams kyi nang nas shar phyogs sgo srung ba mkhas pa chen po shAnti pa zhes pa snyigs ma'i dus kyi thams cad mkhyen pa gnyis pa lta bur grags pa de nga'i bla ma'ang yin pas/ der song gsungs nas rgya gar du byon pas shAnti pa grags pa che zhing mkhas par dgongs nas khong gi drung du lo brgyad bzhugs te/ 'dul ba dang / phar phyin/ nyi khri/ dag ldan/ snying po mchog /sher phyin man ngag ste shAnti pa'i 'grel pa skor