[A:16]gsum du grags pa rnams gsan/ de nas dbang bskur zhus nas dges rdor rgyud gsum/ bde mchog la sogs pa mang du gsan cing / mkhas pa gzhan rnams la'ang chos 'brel re yod gsungs/ gzhan yang dus 'khor ba dang / a mo gha badzra la sogs pa la'ang chos mang du gsan no/ /de nas bod yul du 'byon dgongs tsa na shar phyogs na kha sarpA Ni snyan pa dang grags pa che bas phyag mchod bya ba'i phyir byon pa dang / de dang nye ba na ku ba tshal zhes bya ba'i nags stug po zhig 'dug pa'i nang na dge slong chos gos gsum pa lhung bzed dang bcas pa zhig gis shing sdong zhig la gsil byed thug thug byas pas shing sdong de'i nang na ser gnas tshur lus mi snang bar lag pa gnyis rin po che'i rgyan sna tshogs kyis brgyan pa zhig gis bsod snyoms 'bul ba mthong nas/ shin tu dad de phyag dang bskor ba dang bsnyen bkur byas nas bdag rjes su 'dzin par zhu byas pas/ khyod ci don du gnyer gsungs/ chos don du gnyer/ de'i nang nas kyang gsang sngags don du gnyer zhus pas/ 'o na dbang bskur dgos gsungs/ sngar bha ro haM thung dang shAnti pa las thob zhus pas/ nga'i chos 'dod na nga rang gis dbang bskur dgos gsungs nas dbang bskur ro/ /de lta bu'i dge slong de ni birWa pa'i slob ma Dombi he ru ka'i brgyud pa 'dzin pa/ slob dpon mi thub zla ba'i dngos kyi slob ma'i mchog rab tu byung ba'i mtshan pradznyA indra ru tsi ra bya ba/ bod skad du/ shes rab dbang po mdzes pa zhes bya ba gsang mtshan dpal bo rdo rjer grags pa yin no/ /de'i drung du lo bzhi bzhugs te dgyes pa rdo rje'i rgyud gsum/ Dombi pa'i rjes su 'brang ba'i 'grel pa sgrub thabs yan lag dang bcas pa dang /