[A:24]de tsam na drod ma yal bar 'dug zer/ de nas bar dor phyag rgya chen po mchog gi dngos grub thob pa yin no/ /des na bdag nyid chen po des sangs rgyas kyi bstan pa la bstan pa'i smad 'dir shin tu drin che ba yin gsungs so//
! bzhi pa slob ma'i mchog ji lta bu byung ba ni/ de lta bu'i rje mu gu lung pa de la slob ma'i mchog ji lta bu byung na/ spyir bsam gyis mi khyab kyang bla ma nyid gzhung gsungs pa'i slob ma la man ngag mi gsung / man ngag gsungs pa'i slob ma la gzhung mi gsungs pa yin pas/ gzhung tshar ba'i slob ma/ man ngag tshar ba'i slob ma/ grub pa thob pa'i slob ma dang gsum las/ dang po ni/ lha rtse'i gyi ljang dbu dkar ba/ shangs kyi brag rtsa so nag pa/ 'phrang 'og gi dprad ston dkon mchog rgyal po/ sa skya'i 'khon dkon mchog rgyal po/ phyi tshar la mnga' ris pa gsal ba'i snying po dang lnga yin no/ /gyi ljang dbu dkar bas gser srang drug cu 'bul bar khas blangs nas gzhung zhus pas spyir rgyud gsum dang / khyad par sambu Ti la mkhas pa zhig byung / de nas gser srang drug cu po 'tshol du mdo khams lho brgyud la byas nas rgya nag tu byon/ rgya'i rgyal po'i bla mchod mdzad nas bla ma la gser srang brgya bskur ba las/ phyag tu bzhi bcu tsam las ma smin yang rgyab yig la gzigs pas bla ma mnyes skad/ mdor na 'dis bshad pa ni cher ma mdzad/ sgrub pa la gtso bor mdzad pas nus pa chen po byung / mgon po la rtsal thon pa yin skad/ 'ga' zhig na re/ gzhung tshar nas gdams ngag zhus pas nor khyer la shog gsungs nas/ dbus su phyin/ mthu tshol 'dra byas pas g.yu phad khud gang