[A:25]rnyed/ bla chen la phul nas bla ma'i chos kyis btsal ba min/ bdag rang gis phan bya gnod bya 'dras btsal ba lags zer/ der bsam mi khyab la sogs pa rnams las gzhan gdams ngag ma gsungs so/ /brag rtsa so nag pa ni/ bla ma la gzhung tshar nas bsnyen sgrub la gtso bor mdzad do/ /dbrad sgom ni/ sa skya pa dang thugs kyang shin tu mthun cing khong gnyis la dkon mchog rgyal po rnam gnyis kyang zer skad/ so nag pa dang 'di gnyis la slob ma ni 'phel ba med gsungs so/ /
sa skya pa ni yab mes thams cad gsang sngags rnying ma ba yin te/ de'ang zhib tu brjod na/ sprul pa'i rgyal po khri srong lde'u btsan gyi sku ring la rgyal po'i nang mi la gtogs pa 'khon dpal bo che bya ba la sras bzhi 'khrungs pa'i che ba khri mdzes lha legs/ gnyis pa tshe la dbang phyug /gsum pa klu'i dbang po srung ba zhes bya ba/ lo tsA ba sad mi mi bdun gyi nang nas gzhon gsum gyi mkhas shos su byed pa de yin no/ /bzhi pa tshe 'dzin no/ /de'i sras slob dpon padma'i dngos slob 'khon rdo rje rin chen no/ /de la sras bdun byung ba'i tha ltag shes rab yon tan/ de'i sras yon tan 'byung gnas/ de la sras gnyis byung ba las/ che ba tshul khrims rgyal po'o/ /de la sras gsum byung ba'i che ba rdo rje gtsug tor/ de la sras bdun byung ba'i lnga pa 'khon dge skyabs/ de la sras gnyis byung ba'i che ba dge mthong / de'i sras bal po ste/ tsha mo rong glang gi brag la yang phur gyi sgrub pa mdzad pas brtan ma bcu gnyis bran du 'khol ba'i grub pa brnyes pa yin skad/ de'i sras shAkya blo gros te/ de thams cad kyis phar phyin dang /