[A:26] gsang ba sde drug /le'u lag bdun/ phra mo nyi shu rtsa gcig la gtso bor byed pas gtsigs kyi chos drug ces bya ste/ de'i man ngag dang ldan zhing / yang dag grub pa dang / rdo rje phur pa'i yi dam gyi sgo nas dngos grub kyi rim pa thob pa sha stag kyang yin no/ /shAkya blo gros la sras gnyis kyi gcen po shes rab tshul khrims zhes pa ni/ yab mes kyi chos de dag gis rgyud sbyangs shing rdo rje phur pa'i sgo nas dngos grub brnyes pas mthu dang rdzu 'phrul bsam gyis mi khyab pa dang ldan pa/ tshul khrims kyis mdzes par byas pa yin no/ /de'i gcung dkon mchog rgyal po ni/ gcen sku gshegs khar gcung dkon mchog rgyal po la/ nga ni rgas/ khyed gzhon pas 'brog mi lo tsA ba las gsang sngags gsar 'gyur slob cig /khyod la phan thogs pa 'ong gi /gsungs pa la mu gu lung du ma thon par g.ya' lung du 'brog mi'i slob ma khyin lo tsA ba la/ dbrad dkon mchog rgyal po dang gnyis kyis brtag gnyis gsan/ tshar la khad par khyin sku gshegs/ de'i zhal chems la khyed kyi chos 'phro mang mkhar du bla chen 'brog la zhus shig gsungs pas/ de nas bla ma dkon mchog rgyal po mang mkhar du bla chen 'brog mi'i drung du byon pas/ khyed pha shi nas mes po can du snyegs sam/ 'gro sa ma logs gsung nas/ der rgyud gsum gyi gzhung gi slob gnyer tshar nas de'i rnam gzhag bya ba dang / gdams ngag zhu bar dgongs te/ yul du byon nas g.ya' lung 'jag gshongs kyi zhing btsong bar 'os pa kun btsong / lhag ma dge 'dun 'phrad pa la phul nas da lta'ang gnas chung yod/ rin la rta bcu bdun gyi khal dang bcas pa khyer nas 'ongs te bla chen la phul bas/ ngas rta rgan mi sos mi 'dod gsung /