[A:63]gi dbu zhabs gnyis dang bar du gnyis gnyis te tshogs 'khor bzhi mdzad/ phyis dbu zhabs gnyis dang dam tshig gi nyams chag bskang ba'i skabs su dang gsum du mdzad/ phyis gnyis dang gcig tu'ang mdzad do/ /bar skabs shig tu khams pa sga theng bya ba bla ma yun ring du bsten pa zhig gis ru mtshams su chos 'khor la gdan drangs pa dang khong gis lam 'bras kyi zin bris la gzigs pas chos kyi gnad 'khyugs pa las mi 'dug /der bla ma sa chen gyis dgongs pa la nga shi na chos 'di nub 'gro bar 'dug dgongs te/ khong gis zhus pa'i don du lam 'bras sga theng ma zhes bya ba de mdzad/ de nas zhu ba po so so'i ngor zhu byas ma/ klog skya ma bya ba la sogs pa mdzad/ mdor na snga phyir 'grel pa bcu gcig mdzad pa las thams cad kyi rjes ma dge bshes gnyags kyi ngor mdzad pa'i gnyags ma ni tshig nyung don rgyas la tshig bsdebs legs te/ 'thad par dgongs nas deng sang gi bar du phyag dpe mdzad do//
! gnyis pa rtogs pa'i yon tan ni/ sdom pa gsum dang 'gal ba'i nyes pa phra zhing phra bas kyang ma gos shing byams pa dang thugs rjes rgyud brlan pa/ dngos po gang la'ang mi chags pa/ dad pa dang sgrub pa'i sgo nas bla ma rnams mnyes par mdzad de/ nang rten 'brel thams cad 'grigs pas yi dam gyi lha'i zhal gzigs pa dang / chos thams cad la mnga' brnyes pa dang / mngon shes dang rdzu 'phrul la sogs pa la thogs pa med pa mnga' ba yin no/ /de'ang gzhon nu'i dus su 'jam dbyangs bsgrubs pa'i tshe/ dang por bar chad kyi ltas cung zad cig byung nas mi g.yo ba'i sgrub thabs bsgrubs pas bar