[A:287]gnas thams cad la mi 'jigs pa'i spobs pa thob pa yin te/ bstod pa mdzad pas kyang / zab mo'i lam gyis byin gyis brlabs pa'i tshe/ /zhes sogs gsung pa lta bu'o/ /
'on kyang tha snyad du gnas bcu gsan nas srol phye tshul cung zad brjod na/ thog mar sgra rig pa la/ rje btsun chen po grags pa'i zhabs drung du sgra'i gnas brgyad smra sgo la sogs pa rnams gsan cing / de nas 'dzam bu gling gi rgyan dam par gyur pa/ kha che'i bsod snyoms pa chen po mahA paNDi ta shAkya shrI la sgra ka tsan snying po bsdu ba la sogs pa'i sgra'i mdo rnams rags rim gsan cing / nub phyogs a ti na war sku 'khrungs pa'i bram ze'i slob dpon chen po surga ta shrI dpal ldan sa skyar spyan drangs nas lo gnyis kyi bar du ka lA pa rtsa ba dang / de'i 'grel pa stong phrag drug pa dang bcas pa/ ming sgrub pa su wanti/ byings sgrub pa ti wanti/ rab tu sgrub pa mtha' dag gsan/ paNDi ta chen po sangga shrI la tsandra pa/ de'i ming dang byings kyi sgrub pa rnams mtha' chod dang bcas pa gsan nas khong du chud par mdzad de/ de dag gi tshul gsal bar ston pa la/ skra la 'jug pa'i rnam bshad/ mkhas pa 'jug pa'i sgo/ smra sgo'i don bsdu la sogs pa mdzad nas/ sgra rig pa'i phyogs kyi srol legs par btod pa yin te/ nyid kyi gsung las/ gzhan dag gis ni sngon chad lugs 'byung 'di/ /gangs ri'i ngogs 'dir rgyas par ma mdzad la/ /de na mkhas pa rnams kyang rmongs gyur pas/ /'di la kho bo blo gros gsal phyir dbye/ /zhes gsungs shing / dpal khang lo tsA ba'i bstod par yang / indra pA Ni byA kar cha bsags so/ /legs sbyar rgya mtsho de nyid